Бишкекте 15-декабрда Саламаттыкты сактоо министрлигинин алдына медицина кызматкерлери митингге чыгышты. Себеп – кошумча эмгек акылардын берилбей жатышы.

Чогулгандар коронавирус эпидемиясында “кызыл аймакта” иштегени үчүн эмгек акыларын 2 айдан бери ала албай жатканын айтып, убада кылынган сумманы төлөп берүүнү талап кылып жатышат.

– Октябрда “кызыл аймакка” кирип иштегенбиз, ошонун эмгек акысын бүгүнкү күнгө чейин ала албай жатабыз. Бизге да каражат керек, тынчтык митингине чыгууга аргасыз болдук. “Кызыл аймактын” акчасын убада кылгандан кийин чечип берип коюшса болот эле,- дейт Республикалык ооруканада медайым болуп иштеген Малика Токтобекова.

Чогулгандардын айтымында, Республикалык ооруканада “кызыл аймакта” иштегени үчүн эмгек акысын ала албай жаткан 200дөй медицина кызматкери бар.

Коронавирус эпидемиясында “кызыл аймакта” иштеп жүрүп аталган илдетти жуктуруп алган медицина кызматкерлерине бир жолку акчалай компенсация төлөнөт. Расмий маалыматка таянсак, 8-декабрга карата жалпы 608 медицина кызматкерине 200 миң сомдон кошумча акы төлөндү. Каза болгон 30 медицина кызматкеринин үй-бүлөлөрүнө 1 миллион сомдон төлөнүп берилгени айтылды. Дагы 148 кызматкерге, каза болгон 2 кызматкердин үй-бүлөсүнө компенсация төлөө үчүн документтер даярдалып жатканын билдирген Саламаттыкты сактоо министрлиги.

Жумабай Акимов