Кийим тандаганда кездемесине, өңүнө, фасонуна жана кийимге ылайык келген аксессуарларга басым жасалат. 2021-жылдын жазында кандай кийимдер актуалдуу болуп жатканын билгиңиз келсе, дизайнер жана стилист Арзубек Вонаманын кеңешин сунуштайбыз.

2021-жылдын жазгы тенденциясы – “90-жылдарга кайтуу”. Плащтардан эки борттуу оверсайз тренч түрү модада. Кочкул жашыл, кочкул күрөң жана кызгылт сары өңдөрүн тандасаңыз саркечтикке туура келет. Пиджактарга кур тагынуу дагы модада.

Бул жазда эң эле актуалдуу болгон шымдар – палаццо, кюлот моделиндеги жана кенен шымдар. Табитиңизге жараша рубашка, футболка менен кийсеңиз болот. Ал эми бутка туфли, ботос кийүү сунушталат. Жынсы, плащевка, хамелеон (өңдөрү кубулуп турган) кездемелерден тигилгендери актуалдуу.

Кең жакалуу, ачык түстөгү көйнөктөр жана ийиндери фонарик формасында тигилген жеңдүү көйнөктөрдү тандаган кыздар саркечтердин катарын толукташат. Көйнөктөрдү тандоодо пахта, штапель, шифон жана тор (сетка) түрүндөгү кездемелерден тигилгенине басым жасоону дизайнер сунуштайт. Өңдөрү каалагандай болсо боло берет.

Тизеден бир аз ылдый, кызыл ашыкка чейинки узундуктагы, анын ичинде миди юбкалар актуалдуу болот. Алды ачык бир өңдүү миди юбкалар дагы трендде.

Cпорттук бут кийимден таманы калың, бир өңдөгүсүн тандаңыз. Туфлилерден алтын, күмүш түстүүлөр саркеч келет, такасы бийик же жапыз болсо боло берет.

Сумка: классикалык, ошондой эле чынжырлуу, кабылып тигилгендей, винтаж моделиндеги чоң жана орто көлөмдөгү сумкала

Көз айнек: 80-90-жылдардагы ретро стилиндеги көз айнектер

Моюн орогуч: мончогу жок жука тор жана шифон кездемелерден тигилген жоолуктар, моюн орогучтар.

Сөйкө: геометриялык ар түрдүү түзүлүштөгү алтын, күмүш түстүү сөйкөлөр.

Шуру: көлөмдүү чынжырчалар жана шурулар, ири кулондор.

Материалды даярдоодо көмөктөшкөн lookstore_karavan, viviblansh, bijou_maniya.caravan жана Караван С2 дүкөндөрүнө ыраазычылык билдиребиз.

Гүлдана Мамадали кызы