Бишкектин ичине жүргүнчү ташыган кичи автобустарды киргизбөө сунушу кайра каралат. Бул тууралуу мэрдин милдетин аткаруучу Бактыбек Кудайбергенов билдирди.

Өзбекстандан күтүлүп жаткан 350 автобус толук келген соң шаарды “маршруткалардан” арылтуу демилгеси караларын айтат шаар жетекчиси. Шаардын борбордук бөлүгүндө автобус жана троллейбустар жүргүнчү ташып, кичи автобустар шаар сыртындагы жаңы конуштарды тейлеп баштамакчы.

22-июнга карата Өзбекстандан 50 автобус алынып келинип, ишке киргизилди. Жаңы автобустар жүргүнчүлөрдү 1 апта бекер ташый турганы да айтылды. Калганы 2021-жылдын октябрына чейин алынып келинери күтүлүүдө.

Бишкекти кичи автобустардан тазалоо демилгеси буга чейин да көп жолу көтөрүлүп, ишке ашпай келет. Бул жолку аракеттин жыйынтыгы саналуу айлардан кийин көрүнөт.

Жакында Бишкекте жүргүнчү ташыган кичи автобустардын айдоочулары бир нече күн ишке чыкпай, жарандарга ыңгайсыздык жаратышты. Алардын жол кирени көтөрүү талабы аткарыла элек, маселени Бишкек шаардык кеңешинин 11-июлда жаңы шайланып келчү депутаттары карашмакчы.

Жолдубек Качкынбаев