Өлкөдө Пакистан жарандарынын көбөйүшү парламентте да талкууланып жатат. 7-сентябрда парламенттин комитет жыйынында депутаттар Кыргызстанга пакистандык туристтерди чакырган компаниялар ал туристтер боюнча жоопкерчилик алышы керектигин айтып чыгышты. Тагыраагы, өлкөгө келген пакистандыктарды көзөмөлдөшү керек дешти. Ошондой эле алардын келиши менен эпидемиологиялык кырдаал курчуп кетиши мүмкүн деген пикирлер да айтылды.

Тышкы иштер министринин орун басары Айбек Артыкбаев пакистандыктардын келиши эпидемиологиялык кырдаалга таасир этпегенин билдирди.

– Пакистандан келген туристтер электрондук виза алышкан. Анкетаны толтургандан кийин 5 күндүн ичинде УКМК текшерип уруксат берет. УКМКнын уруксатынан кийин Тышкы иштер министрлигинин Консулдук кызмат департаменти тастыктама берет. 1-январдан тарта 9 917 адамга виза берилиптир. Алар каттоого алынбайт. Виза бир айга берилгенде Чек ара кызматы өлкөгө кирип-чыгарда мөөр басат. Туристтик компаниялар өздөрү уюштуруп, аларды аэропорттон тосуп алып, автобус менен мейманканага жайгаштырат. Аларды коштоп жүрөт. Ушул маселе боюнча коомчулуктун коопсуздугун карап, виза берүүнү токтотконбуз. Пакистандык, индиялыктарга виза берүү токтотулган. Алардын келиши менен өлкөдө эпидемиологиялык кырдаал оорлошкон эмес, ошондой эле туристтер катышкан чыр-чатак катталган эмес,- дейт Артыкбаев.

Ал эми “Манас” аэропорту пакистандык туристтердин эсебинен 540 миң доллар пайда тапканы айтылды. Бүгүнкү күнгө карата Пакистан, Индия өңдүү мамлекеттерден Кыргызстанга 12 миң жаран учуп келген. Булар өлкөдө убактылуу болуп БАЭ, Орусия сыяктуу мамлекеттерге мигрант катары учуп кетишери айтылып жатат.

Лунара Бекиева