Президент Садыр Жапаров 21-сентябрда Бириккен Улуттар уюмунун Башкы ассамблеясынын 76-сессиясында видеокайрылуу жасады. Дүйнө коомчулугунун көңүлүн Кыргызстандагы экологиялык маселелерге бурду.

– Тилекке каршы, Кыргызстанда ниети түз эмес инвесторлор ири кирешени көздөп, элдин ишенимин кыянаттык менен пайдаланып, экологияга олуттуу зыян келтирген учурлар бар,- деген Садыр Жапаров улуттук мыйзамдарга ылайык, Кыргыз бийлиги мындай иштерге бөгөт коюп жатканын, ал эми бузулган экологияны калыбына келтирүү ишин өзү чечүүгө аргасыз экенин билдирди. Мисал катары зыяндуу калдыктарды коопсуз жайга жайгаштыруу, таштандыларды жок кылуу иштерин атады.

Жапаров Кыргызстандын негизги жетишкендиги демократиялык модель жана күчтүү жарандык коом экенин белгилейт.

– Тарыхый ченемдер боюнча 30 жылдык кыска убакытта демократиянын мамлекеттик өнүгүү модели катары калыптанышы жана күчтүү жарандык коом республиканын негизги жетишкендиги болуп саналат. Менимче, мындай баа берүүмө көпчүлүк макул болсо керек. Биз демократиялык жолдон кайтпайбыз деп ишендирип кетким келет. Бул биздин эркиндикти сүйгөн элибиздин талабы,- деди президент.

Президент Кыргызстанда ГЭСтерди куруу иши жанданарын айтты.

– Кыргызстанда ГЭСтерди куруу жаатында долбоорлорду ишке ашыруу Борбор Азия мамлекеттеринин гидроэнергетикага болгон муктаждыгын канааттандырат. Суу-энергетика комплексине, Париж келишиминин духунда өз ара пайдалуу кызматташууга инвесторлорду чакырам,- деди президент.

Садыр Жапаров 2022-жылды кайрадан “Эл аралык тоолор жылы” деп жарыялоо, Борбордук Азиянын коопсуздугу менен өнүгүүсүн, келечек планын белгилеп алуу үчүн 2022-жылы Борбордук Азия – БУУ саммитин өткөрүү, эл аралык жүк ташууларда чек арадан өтүүнү жөнөкөйлөтүү өңдүү сунуштарды берди.

Лунара Бекиева