Саясатчы, Чүйдүн экс-губернатору Туйгунаалы Абдраимов 20-сентябрда УКМК тарабынан кармалды. Мекеменин маалыматына таянсак, саясатчы “мыйзамсыз баюу” беренеси боюнча кылмышка шектелип жатат. УКМК Абдраимовго таандык делген мүлктөрдүн тизмесин жарыялады. Анда экс-чиновник жакындарына жана айрым тааныштарына 16 батир, 18 жер тилкеси, 2 автоунаа токтотуучу жай, 5 турак жай, 3 дыйкан чарба, 16 автоунаа жана “Ысык-Ата” курортунун аймагында курулушу бүтө элек объектилерди каттаткан деп айтылат. Бул кымбат мүлктөрдүн баалары Абдраимовдун расмий кирешесинен эселеп ашып түшөрү да белгиленет.

– Тергөөдө Туйгунаалы Абдраимов жогорку мамлекеттик кызматтарда иштеп турганда кызматтык абалынан кыянаттык менен пайдаланып, мыйзамсыз баюу жана материалдык пайдалар менен артыкчылыктарга ээ болуу үчүн мыйзамсыз түрдө активдерин көбөйткөндүгү аныкталган. Анын жана жакын туугандарынын активдери киреше жок болгон учурда да кескин көбөйүп, 250 миллион сомдон ашык бааланган,- деп айтылат УКМКнын билдирүүсүндө.

Туйгунаалы Абдраимов бул маалыматты жарым-жартылай четке какты. “Автоунааларды, кыймылсыз мүлктөрдү сатып алып, кайра саткам. УКМКнын маалыматында анын баары меники деп көрсөтүлүп жатат” дейт ал. Бул окуяны экс-чиновник “менин саясий ишмердүүлүгүмө байланыштуу болушу мүмкүн” деп атады.

Лунара Бекиева