10-ноябрда жапжаңы депутаттар Ак үйгө чогулушуп, бирок 1-жыйыны болбой калган. Себеби алгачкы жыйын төрага шайлангандан кийин гана болору айтылган. Ал эми төрага парламентте коалиция түзүлгөн соң дайындалат.
Ошентип, өткөн аптада коалиция түзүү милдетин ажо КСДПга тапшырган. Арадан бир апта өтсө да, коалиция кайсы партиялардан куралары белгисиз. Эгерде КСДПнын колунан бул иш келбесе, анда, президенттин айтуусу боюнча, жоопкерчилик “Ата Мекен” партиясына берилет. Учурда көшөгө артындагы сөздөрдү ачыкка чыгарсак, КСДП “Ата Мекен” партиясынын коалицияга кирүүсүн каалаганы менен, бийликтеги маанилүү чылбырды карматууга көңүлдөнбөй турат имиш. Балким, “республикачы” Өмүрбек мырза спикерликти сурап жаткандыр? Же КСДП менен “бабановчулардан” орун ашпай жаткан чыгар?
Шайлоодо канча мандатка ээ болгонуна карабай, ырас, коалицияга бириккен соң бардык партия бирдей укукка, мүмкүнчүлүккө, чечүүчү ролго ээ болгусу келет. Анысы деле туура дечи. Анткени эл маселелерди чечүүнү коалициядан талап кылат да. “Булар көп мандатка ээ, булардан көп жоопкерчилик талап кылалы. Булар аз мандатка ээ, булардан аз эле нерсени талап кылалы” демек беле? “Ата Мекен” акыркы жообун айтпай, ойлонуп турганынын себеби да ушундадыр?
Мындай ич ара “соодалашуунун” узакка созулганы КСДПнын өзүнө эле зыян. Анткени өз убагында коалицияны түзө албай калса, анда “ата мекенчилер” келме кезегин колго алып, башка партиялар менен көпчүлүктү курап алышы да ыктымал.