Баткенде Тажикстандын чек арачылары Кыргыз жаранына ок атты. Унаасын айдап бараткан жергиликтүү тургунду тажик аскерлери аткылап качып кеткени боюнча видео тасма 22-декабрда интернет желесине тараган. Чек ара кызматынын маалыматына таянсак, Камаздын маңдайкы айнегине бир нече жолу ок атылган, айдоочу айнек сыныктарынан улам жеңил жаракат алды. Бул окуя боюнча Баткен жана Согди облустарынын чек ара өкүлдөрүнүн жолугушуусу өткөнүн президенттин Баткен облусундагы өкүлчүлүгүнөн билдиришти. Маалыматка таянсак, жолугушууда тараптарга окуянын хронологиясы жана анын орун алган жери көрсөтүлдү. Жыйынтыгында Тажик тараптын өкүлдөрү күнөөлөрүн моюнуна алышты жана мындан ары курал колдонуулар кайталанбашы керектиги айтылып, тажик тарап күнөөлүүлөр жоопко тартыларын билдиришти. "Кыргыз тараптан сунушталган биргелешип териштирүүдөн Тажик тарап баш тарткандыктан, эки тарап ар кимиси өз аймагында териштирүү жүргүзүп, жыйынтыгы тууралуу бири-бирин маалымдоо макулдашылды",- деп айтылат маалыматта. Мындан тышкары, эки тараптан өздүк курам арасында түшүндүрүү иштерин жүргүзүүнү активдештирүү жана жакынкы кыска мөөнөттө чек ара заставалардын башчылары менен биргелешкен сабактарды уюштуруп өткөрүү макулдашылганы белгиленди.