Казакстандын чек арачылары кармап кеткен Сыймык Өмүрбек уулунун энеси Чынара Тамаева 26-январда президент Садыр Жапаровго жана УКМКнын төрагасы Камчыбек Ташиевге кайрылды.

– Уулум Караколдо педагогикалык колледжде 2-курста окуйт. Айылга кышкы каникулга келген. Ошол күнү тоого мал издеп кетип, кечинде келген жок. Тоо тараптан кыйкырып издеп таппай калдык. Түн ичинде биздин чек ара кызматындагылар "уулуңуз чек арадан өтүп кетип, Казакстандын чек арачылары кармап кетти" деп чалышты. Ошондо гана билдик. Андан бери 16 күн өттү, балам чыга элек. Баламды эртерээк бошотуп берүүңүздөрдү суранам,- деди Чынара Тамаева. Эске салсак, 10-январда Казак чек арачылары Ысык-Көл облусунун Түп районунун 1999-жылы туулган тургунун Каркыра жайлоосунан кармап кетишкен. Бул маселе Жогорку Кеңештин жыйынында да айтылып, тийиштүү органдарга тапшырма берилери айтылган болчу.

Лунара Бекиева