Бет терисиндей эле колубуздун териси дагы ар бир күнү кам көрүүгө муктаж. Колго кам көрүү боюнча косметолог Айчүрөк Жороевадан чакан кеңеш.

ҮЙ ШАРТЫНДА КАМ КӨРҮҮ

1. Үйдө ар кандай химиялык каражаттарды колдонууда колуңузду этияттаңыз, сөзсүз кол кап кийүү абзел.

2. Ар бир күнү азыктандыруучу, нымдаштыруучу кремдерди сүйкөп туруу шарт.

3. Аптасына бир жолу үзгүлтүксүз скраб жасаңыз жана атайын маскаларды колдонуңуз.

4. Жайында колуңуздун терисин күндөн сактаңыз – SPF фактору бар крем сүйкөңүз.

5. Кышкысын сөзсүз сууктан коргоочу кремди эшикке чыгардан 20 мүнөт мурун сүйкөп, көчөдө кол кап кийүү керек.

КОСМЕТОЛОГИЯЛЫК ПРОЦЕДУРАЛАР

Пилинг. Кургак болуп кол терисинин жарыла берүүсү – көпчүлүк адамдардын көйгөйү. Андан тышкары теринин түсү дагы өзгөрүп, майда тактар пайда болот. Бул ар кандай зыяндуу нерселерден теринин жабыркашынын белгиси. Мындай учурда жардамга келчү косметологиялык процедура – пилинг. Бул процедура учурунда өлүк клеткалар тазаланып, коллагендин иштелип чыгышы көбөйүп, колдун терисинин көрүнүшү жакшырат. Ал эми Е витамини жана жожоба майы кошулган пилингдерди колдонсоңуз колуңуздун терисинин жаш көрүнүшүн камсыздайт.

Парафин терапиясы. Бул 40 градуска чейин ысытылган парафин менен жүргүзүлөт. Бул процедуранын таасири дароо байкалат. Тери назик болуп нымдашып калат жана парафин байламталарды бекемдөөгө дагы таасирин тийгизет. Парафин терапиясы – теринин терең катмарларына таасир этүүнүн жана азыктандыруунун эң сонун жолу.

Укалоо. Колго, ар бир манжага укалоо жасоо дагы терини жакшыртат. Бул ыкма кан айланууну жакшыртып, адамдын жалпы психикалык абалын калыптандырат. Ошондой эле бүт денени эс алдырууга таасир этет. Мындан тышкары косметологияда терини жакшыртуучу мезотерапия, плазмотерапия, биоревитализация деген процедуралар бар.