Бишкектеги №47 абак жабылганын 23-мартта Жазаларды аткаруу мамлекеттик кызматы билдирди.

– Өкмөттүн жана ЖАКнын ведомстволук буйруктарына ылайык, 47-колонияны толугу менен демонтаждоо, андан кийин медициналык, турак жай жана башка жаңы имараттарды куруу боюнча чечим кабыл алынды. Бул тууралуу чечим жумушчу жыйында кабыл алынып, 47-колонияны жоюу процессин, соттолгондорду башка мекемелерге бөлүштүрүү маселеси талкууланды. Тактап айтканда, жакын арада бардык соттолгондор кылмыш категорияларына жана аларды кармоо режимдерине ылайык, башка мекемелерге которулушат,- дешти мекемеден.

Мурдагы президент Алмазбек Атамбаев да ушул абакта жаза мөөнөтүн өтөп келген. 23-мартта интернет желесине Атамбаевди жука кийимчен мажбурлап сотко алып келишти деген видео тарап, талкууга түштү. ЖАМК "Атамбаевди эч ким сүйрөп келип унаага салган эмес, процесске кандай кийим кийип барарын соттолуучу өзү чечет" деп комментарий берди.

Лунара Бекиева