Парламент төрагасы Талант Мамытовдун жетекчилиги астында Аялдардын, балдардын укуктары жана гендердик теңдик боюнча кеңештин алгачкы жыйыны өттү. Жыйынга парламент депутаттары, эл аралык уюмдардын жана жарандык коомдун өкүлдөрү катышты. Спикер аялдардын жана балдардын укугун коргоодо, гендердик теңдикти камсыздоодо аталган кеңештин орду зор экенин айтат. Ал парламентте жана жергиликтүү кеңештерде аялдардын санын 30 пайызга жеткирүү демилгеси колдоого ээ болгонун баса белгиледи. Катышуучулар тарабынан ишкер жана лидер аялдарды колдоо, бул маселеге парламенттик көзөмөлдү күчөтүү боюнча сунуштар айтылды.

Борбордук Азиядагы көпчүлүк өлкөлөрдөй эле Кыргызстанда да гендердик теңдик маселеси актуалдуу бойдон калууда. Улуттук статистика комитетинин маалыматына таянсак, 2021-жылдын 1-январына карата Кыргызстанда аялдардын саны 3,3 миллионду түздү, бул – өлкөдөгү жалпы жарандардын 50,4 пайызы. Учурда аялдар көбүнчө саламаттыкты сактоо, билим берүү, калкты социалдык жактан тейлөө жана соода тармагында иштейт. Учурда эркектерге караганда аялдар көп иштеген 3 министрлик белгилүү. Социалдык өнүгүү министрлиги (аялдар 72 пайыз), Саламаттыкты сактоо министрлиги (аялдар 66 пайыз) жана Маданият, маалымат, спорт жана жаштар саясаты министрлиги (аялдар 62 пайыз).

Жогорку Кеңештин 7 чакырылышында 19 аял-депутат бар, бул жалпы депутаттардын 17 пайызын түзөт.

Лунара Бекиева