Чаткалдын Терек-Сай айылындагы орто мектепте 18 окуучу жана 1 мугалимдин үстүнө класстын шыбы урап түштү. Окуя 17-майда №18 Чымканаев атындагы мектепте катталды. Расмий маалыматка таянсак, кырсыктан олуттуу жабыркагандар жок. Билим берүү жана илим министрлиги “мектептин эскилиги жеткен, бирок буга чейин авариялык абалда эмес болчу” деп билдирди. Бул окуя боюнча Бишкекте Министрлер кабинети жыйын өткөрүп, анда мектептердеги коопсуздукка жооптуу органдардын иши сынга алынды. Өлкөдөгү бардык мектептердин техникалык абалын текшерип чыгууга тапшырма берилгени маалымдалды.