Аптанын окуясы

Ачылганына бир апта болбогон “Таза багыт” коомдук бирикмеси оңой эмес, опол тоодой акчага издөө салды. 2010-жылдын бюджетинин таңсыктыгы башында эле 13 миллиард сом экени баарына белгилүү болчу. Бирок ноябрь айында Каржы министри Чоробек Имашев быйылкы жылдын дефицити дагы 3 миллиард сомго көбөйгөнүн билдирген.
«Таза багыт» «Анда апрель айынан бери бюджеттин кошумча каражатына которулган 452 миллион доллар кайда кеткен?» деп суроо салат. Алар Өнүктүрүү фондунун эсебинен 213 миллион доллар, Бакиевдин жакындарына тиешелүү банктагы эсептеринен 19,7 миллион доллар жана 219 миллион доллар гранттык түрдө алынганын тактап чыгышкан. «Эгерде бул каражат максаттуу жумшалса, мугалимдер бүгүнкүдөй митингге чыгышмак эмес»,- дешет алар. Анын үстүнө кошумча которулган каражаттын эсеби менен казынанын таңсыктыгы, тескерисинче, азайышы зарыл эле, тактап айтканда, бюджеттин профицити 105 миллион долларды түзүп калмак.
Андан сырткары “таза багытчылар” бийликке кайра эле кечээги “бакиевчилер” келип алышканына өтө нааразы. “Кыргызстанда үчүнчү революция бышып жетиле баштады”,- дейт жаңы бирикменин мүчөсү Орунбек Чондоев. Алардын айтымында, 7-апрелден кийин КСДПнын өкүлдөрү каза болгондордун туугандарына “бакиевчил” реваншисттердин кайтып келбей тургандыгына сөз беришкен. “Бирок КСДП “Ата Журт” партиясы менен коалицияга биригип, элин сатып кетти”,- дейт ал. «Таза багыттын» нааразычылыгы төмөнкүчө уланат: Бүгүнкү өкмөттүн курамында экс-президент Курманбек Бакиевдин жардамчысы Төрөгул Беков Айыл чарба министри болсо, депутат Камчыбек Ташиевдин жакын досу Болотбек Борбиев Өзгөчө кырдаалдар министри болуп дайындалды.
Жогорудагы бирикменин пикири боюнча, шайлоо учурунда «Республика» партиясын Максим Бакиев каржылаган. Ага Аскарбек Шадиев, Игорь Чудинов жана башкалар ортомчулук кылышкан.
Жакын арада “Таза багыт” бирикмеси республика боюнча өзүнүн митингдерин баштамакчы. Алар парламент менен өкмөттү таратууну талап кылышат.