“Өмүрүң узун болсун десең тамеки тартпа, ичимдик ичпе, фаст-фуд жебе, спорт менен машык” деген кеңештерди баарыбыз эле билебиз. Ушул кеңештердин тизмесине дагы бир нече пункт кошуп койсок ашыкча болбостур.

Ысык тамак-аштан кач. Кээ бир адамдар күнүгө ыс-сык чай ичпесе башы ооруйт, тамакты да жаңы бышкан ысык кезинде “кел ай, тамак муздап калат” деп шаштырып ичмей баарыбыздын үйдөгү адат болсо керек. Ысык тамактар айрым бактерияларды өлтүрөт, бирок ошол эле учурда пайдалуу заттарды да жок кылат. Адамдын ички органдары назик келгендиктен, жогорку температурадагы тамак-аш терс таасир тийгизет. Өзгөчө уйку безинин иштешине, боорго күч келтирет.

Сууну өлчөмү менен ичиңиз. Дени сак жашоо үчүн күнүнө жок дегенде 2-2,5 литр суу ичүү керек делинет. Бирок сууну да өлчөмү менен ичүү керек. 1 килограмм салмакка 30 миллиграмм суу ичесиз. Мисалы, 70 килограмм салмактагы адам болсоңуз күнүнө 2 литр суу, 80 килограммдан ашсаңыз 2,5 литр суу ичсеңиз болот. Эгер өлчөмүнөн көп ичсеңиз суу керексиз шлактар менен кошо организмдеги пайдалуу заттарды да жууп кетет. Дагы бир эске алчу жагдай, сууну бир гана жолу кайнатуу керек! Чайнектеги бир кайнагандан калган сууну төгүп салбай, үстү-үстүнө суу куюп кайната берген сайын анда зыяндуу заттар көбөйүп, организмге терс таасирин гана тийгизет. Эгер колдон келсе сууну такыр эле кайнатпай, мыкты сапаттагы фильтр коюп, таза суу ичкен туура. “Аккан сууда арам жок” деп арыктан, кудуктан түз эле иче берген туура эмес. Анткени анда көзгө көрүнбөгөн жүздөгөн курттар, бактериялар бар.

Газ плита колдонбо. Ооба, ыңгайлуу, керектүү. Бирок газ колдонгондо толугу менен күйүп кетпейт. Калдыктары түтүн аркылуу көө түрүндө абага тарайт. Көө түз эле өпкөгө кирет да, өпкө оорулары жаралат. Андыктан газ плитаңызды электр плитасына алмаштырып алыңыз.