Жогорку Кеңештин 15-декабрдагы жыйынында спикер Нурлан Шакиев жаратылыш ресурстары, экология жана техникалык көзөмөл министри Динара Кутмановага орус тилинде баяндама жасоого уруксат берген жок. Орус тилинде сүйлөп баштаган министрдин сөзүн бөлүп “сизге орус тилинде сүйлөөгө ким уруксат берди? Баяндаманы кыргыз тилинде жасаңыз” деди. Мындан кийин Кутманова кыргыз тилинде маалымат берди. Бирок анын сөзүн көпчүлүк түшүнбөй калганын депутат Эрулан Көкүлов айтып чыкты.

– Кыргыз тилинде баяндама уккуңар келсе Конституцияны өзгөрткүлө, Башмыйзамда орус тили расмий тил деп жазылган. Мына, эскертүү алган министр 70 пайыз орусча сүйлөдү, эмнени түшүндүк?- деген депутат кыргыз тилинде сүйлөөнү талап кылуу спикердин каалоосуна жараша чечилбеши керектигин айтты.

Шакиев бул төраганын каалоосу эмес, регламенттин талабы экенин эскертти.