Өлкөдө баш аламандык уюштурууга даярданууга шектелип кармалып учурда камакта отургандардын абалы начар. Бул тууралуу 19-декабрда медицина боюнча эксперт, Бишкектеги №1 СИЗОго барып келген Бермет Барыктабасова өзүнүн интернет баракчасы аркылуу жарыялады.

– СИЗО-1ге көз карандысыз дарыгер катары барып келдим. 4 адамга жолугуп, аларга ачкачылык кармоонун кесепеттери тууралуу эскерттим. Эркектерге караганда аялдардын абалы начарыраак. Орозайымдын (ред.: Нарматова) абалы канааттандырарлык эмес, кыймылы оор, үнү алсыз, кан басымы туруктуу эмес, 5 күндө 5 килограммга арыктаган. 6 суткадан бери тамак жей элек, суу ичүүдө. Ачкачылык кармоону улантуу ниетинде. Перизаттын (ред.: Суранова) да абалы канааттандырарлык эмес, өз алдынча ары-бери баса албайт. Көрүүсү кескин начарлап кеткен. Эркектер карманышууда, медициналык персоналга жана кызматкерлерге дооматтары жок,- дейт Барыктабасова.

Эскерте кетсек, жогоруда аталган кылмышка шектелген 17 жаран ачкачылык жарыялаган. Алар өздөрүнө тагылып жаткан айыптарга макул эмес жана ачкачылык жарыялоонун кесепеттерине президент Садыр Жапаров баштаган тийиштүү органдардын жетекчилери жоопкер болорун айтып жатышат.