Кыргыз экономикасы коронавирус пандемиясынан кийин калыбына келе баштады. Кырдаал турукташууда. Бул тууралуу экономика министри Данияр Амангелдиев 12-январда радиолордун биринин түз эфиринде билдирди.

– Бирок 2022-жылы Орусиянын Украинадагы атайын аскердик операциясы башталганда улуттук валютабыздын куну кескин түшүп кетти. Мунун айынан экономикадагы абал сезилерлик начарлай түштү. Ушундан улам министрлер кабинети кырдаалды анализдеп, тобокелчиликтерди эске алып антикризистик план даярдаган. Баалардын өсүшүн гана кармап туруу эмес, экономиканын бардык тармагын өнүктүрүү пландалган,- дейт Амангелдиев.

Антикризистик пландын негизи – калкты азык-түлүк, товар менен камсыздоо болгон, бул план ишке ашты дейт министр.

– Украинада аскердик операция башталгандан кийин товар жеткирүү иши үзгүлтүккө учурады. Айрым товарлардын, мисалы, дан азыктарынын, кумшекердин жетишсиздиги жаралды. Күйүүчү майлардын баасы өсүп кеткенин көрдүк. Ушундай нерселердин баарынын таасирин азайтуу үчүн бюджеттен 126 миллиард сом чыгым кылууну пландаганбыз,- деди экономика министри.