2022-жылы ырайымсыз мамилеге кабылганын айтып Кыйноолордун алдын алуу улуттук борборуна 62 адам кайрылган. Бул 2021-жылга салыштырганда 32 пайызга көп экенин аталган борбордун жетекчиси Бакыт Рысбеков маалымдады.

Убактылуу кармоочу жайларда, тергөө абагында отургандарды кыйноо, зомбулук көрсөтүү, психологиялык басым жасоо көрүнүшү курч бойдон калып жатканы айтылды. Рысбековдун айтымында, кыйноого кабылганын айтып даттангандардын 46 пайызы Жаза аткаруу кызматына, 31 пайызы ИИМге караштуу мекемелерге, 11 пайызы УКМКнын кызматкерлерине, 3 пайызы Саламаттыкты сактоо, Эмгек жана социалдык өнүгүү министрлигине нааразы.

2022-жылы катталган кыйноо фактыларынын 53 пайызы Бишкек шаары жана Чүй облусунда, 26 пайызы Ош облусунда, 7 пайызы Жалал-Абадда, 7 пайызы Баткенде, 4 пайызы Ысык-Көлдө, 3 пайызы Таласта болгон. Нарында кыйноо фактысы катталган эмес.

Расмий маалыматка таянсак, учурда аталган борбор менен акыйкатчы институтун бириктирүү маселеси каралууда.

19-апрелде Жогорку Кеңеште аталган борбордун жетекчиси 1 жылдык иши боюнча баяндама жасады.