Парламент 17-майда акыйкатчы кызматына Жамиля Жаманбаеваны шайлады. Ага 48 депутат макул деп добуш берди. Ал эми анын атаандашы Бакыт Рысбековду 20 депутат колдоого алды. Айрым депутаттар акыйкатчы жөнүндө конституциялык мыйзамга ылайык, талапкер 51ден кем эмес добуш менен шайланышы керектигин айтып чыгышты. Буга макул эместер Конституция боюнча депутаттардын жарымынан көбүнүн добушун алган талапкер жеңүүчү болорун билдиришти. Жыйынтыгында парламент жаңы акыйкатчыны кызматка шайлады.

Жамиля Жаманбаева 25 жыл прокуратура органдарында иштеген. 2018-2021-жылдары башкы прокурордун орун басары болуп эмгектенген. 2021-жылы “Ата Журт-Кыргызстан” партиясынын катарында парламенттик шайлоого талапкер болуп, бирок жетиштүү добуш ала алган эмес. Акыйкатчылыкка анын талапкерлигин парламенттеги “Ата Журт-Кыргызстан”, “Ишеним” фракциялары жана “Мекенчил” депутаттык тобу сунуштаган. Ал эми Бакыт Рысбековдун талапкерлигин “Бүтүн Кыргызстан” фракциясы сунуштаган. “Ыйман нуру” фракциясы Кулира Кубатованын талапкерлигин сунуштап, шайлоого жакын Кубатова талапкер болуудан баш тартканы жарыяланды.

Буга чейинки акыйкатчы Атыр Абдрахматова “Ата Журт-Кыргызстан” фракциясынын демилгеси менен мөөнөтүнөн мурда кызматтан бошотулган.