Малга салык киргизүү боюнча Жогорку Кеңештин депутаты Жеңишбек Токторбаев сунуштаган мыйзам долбоору коомдук талкууга чыгарылды. Ага ылайык, үйүндө 40 баш кой-эчкиси, 3 баш ую, 2 баш жылкысы барлар салык төлөөгө милдеттүү. Жандыкка 100 сомдон, бодо мал менен жылкыга 250 сомдон салык салуу сунушталып жатат. Малына салык төлөгөндөр жайыт үчүн акы төлөөдөн бошотулары айтылат мыйзам долбоорунун негиздемесинде.

Депутат ушундай жол менен айыл өкмөттөрдүн кирешесин көбөйтүп, жергиликтүү көйгөйлөрдү чечсе болот дейт. Тагыраагы, салыктан түшкөн кирешеге айылдарды ветеринардык дарыгер менен камсыз кылууга, малдарды өз убагында эмдөөгө, жайыттарды жакшыртууга шарт түзүү керектигин айтат.

– Азыркы учурда айыл өкмөттүн киреше булагы – айыл чарбасына жарактуу жерлердин мамлекеттик фондунун жерлерин ижарага алуу төлөмү. Бирок мамлекеттик фонддун жерлери арзан баада ижарага берилет, ал эми калган бөлүгү айрым адамдардын чөнтөгүндө калып жатат. Аны менен мамлекеттик фонддун жерлерин бөлүштүрүү айыл өкмөтүнүн чиновниктеринин “бизнесине” айланып калды,- дейт Токторбаев.