Өлкөнүн энергетика тармагына 3 жылдык өзгөчө кырдаал режими киргизилди. Тийиштүү жарлыкка президент Садыр Жапаров кол койгону 24-июлда жарыяланды. Мындай режимди киргизүү Нарын дарыясындагы суунун азайышы жана электр энергиясын пайдалануунун тездик менен өсүшүнөн улам жаралган энергетикалык кризистен өлкөнү чыгаруу максатын көздөйт деп айтылат маалыматта. Ага ылайык, энергетика министрине өзгөчө укук берилет. Эми министр айыл чарба, жаратылыш ресурстары министрлеринин орун басарларынын, Суу көйгөйлөрү институтунун, “Кадастр”, “Кыргызгеология” мамлекеттик ишканаларынын директорлорунун, акимдердин энергетика багытындагы ишин координациялайт.