Энергетика министрлиги менен Кытайдын ТВЕА компаниясы Сары-Жаз ГЭСтер каскадын курууда жана жогорку кубаттуулуктагы Кемин-Торугарт электр чубалгысын тартууда кызматташуу жөнүндө меморандумга кол койду. Бул меморандум Кытайдын Синьцзян-Уйгур автономдук районунун (СУАР) Компартиясынын партиялык комитетинин катчысы Ми Синжуйдун Кыргызстандагы иш сапары алкагында түзүлдү. Ошондой эле Кыргызстан менен СУАРдын ортосунда жол куруу, электрондук товар жүгүртүүнү өнүктүрүү үчүн почта кызматтарынын байланышын кеңейтүү, Кыргыз жаштары үчүн СУАРдын окуу жайларынан 25 орун бөлүп берүү жаатында макулдашуу жана меморандумдар түзүлгөнү айтылды.