Ушул аптада Казакстанга Кыргызстандан оор жүк ташуучу унаалардын кириши кыйындады. 21-августта Кыргыз-Казак чек арасынын “Ак тилек” пунктунда унаалардын узун тыгыны жаралып, айдоочулар сааттап кезек күтүүгө аргасыз. Бул күнү Казакстан 3 гана жүк ташуучу унааны өткөрдү. Мындай жагдайды Кыргыз коомчулугу Кыргызстандын Казакстанга сугат суу бербей коюшу менен байланыштырып жатат. Бирок Казакстандын да, Кыргызстандын да расмий өкүлдөрү бул божомолду четке кагышты. Ачык айтылбаганы менен, чек арадагы абалга суу маселеси себеп болушу мүмкүн. Анткени өткөн аптада Казакстан тарап Кыргызстанды “Жамбыл облусуна суу берүүнү токтотту” деп сындап чыккан. Мындан кийин Кыргыздын Айыл чарба министрлиги суу берүү эки өлкө ортосундагы келишимге ылайык, макулдашылып токтотулганын, убагында Казакстанга суу ашыгы менен берилгенин эскертти.