Кыргызстанда коомдук жайларда паранжа кийип бетти жаап жана узун сакалчан жүрүүгө тыюу салуу сунушталды. Демилгенин автору – парламент депутаты Шарапаткан Мажитова мындай чара коомдук коопсуздукту камсыздоо үчүн зарыл дейт. Сунушталып жаткан мыйзамга ылайык, коомдук жайларда жарандын өздүгүн идентификациялоого тоскоолдук жараткан (мисалы, адамдын жүзүн толук көрсөтпөгөн абал) кийим кийгендер 2 миң сом суммасында айыпка жыгылат же 30 саатка чейин коомдук иштерге тартылат. Эгер жаран экинчи жолу эреже бузса 4 миң сом айып пул салынып, 40 саатка чейин коомдук ишке тартылат деп айтылат мыйзам долбоорунун негиздемесинде. Өлкөдө убактылуу жүргөн же дипломатиялык статусу бар чет элдиктерге, дарыгердин сунушу менен жүзүн жаап жүрүүгө аргасыз болгон жарандарга бул мыйзам иштебейт.“Кыргыз жарандарын биометрикалык каттоо жөнүндө” мыйзамга ылайык, беттин санариптик графикалык сүрөтү милдеттүү түрдө чогултулуучу, пайдаланылуучу жана сакталуучу биометрикалык маалымат болуп саналат, узун сакал жана жүздү жапкан кийим аталган мыйзамдын аткарылышына мүмкүндүк бербей жатат дейт демилгечи.