Парламенттин 28-февралдагы жыйынында депутат Акылбек Түмөнбаев мурдагы мамлекет башчы Сооронбай Жээнбековду экс-президент макамынан ажыратуу демилгесин көтөрдү. Айтымында, Жээнбеков Бишкек ЖЭБин жаңылоодогу коррупция, ЖЭБдеги жарылуу, пандемия маалындагы иштер үчүн жооп берүүгө тийиш.

– Президент “кийинкибизге жаман болуп калбасын, ошон үчүн экс-президент кылып калтырдык” деп айтып келет. Андай болбошу керек. Эгер коррупцияга каршы аёосуз күрөш жүрүп жатса, анда баары жооп бериши керек. Сооронбай Жээнбеков президент кезинде Алмамбет Салиев деген болгон, ал укук коргоо органдарын гана тескебей, сот органдарына чейин кийлигишкен. Эмне үчүн ал жооп бербейт? Атамбаевдин айдоочусу Илмиянов эмне үчүн жооп бербейт? Мен депутат болгондон кийин Сооронбай Жээнбековду экс-президент статусунан ажыратуу маселесин көтөргөм. Атамбаев менен Сапар Исаков ЖЭБди жаңылоого алынган 386 миллион долларды “жеп” коюшканда бул киши вице-премьер эле. Андан кийин премьер болду, пандемияда башка өлкөлөр берген 600 миллион долларды дары-дармек сатып алууга эмес, башка нерсеге жумшашкан,- деди Акылбек Түмөнбаев.

Бул маселе боюнча Жогорку Кеңеш депутаттык комиссия түзүшү керек деп сунуштады.

Сооронбай Жээнбековду экс-президент катары бир катар артыкчылыктарынан ажыратууну 2022-жылы депутат Жеңишбек Токторбаев сунуштап чыгып, колдоо тапкан эмес. Жээнбеков мамлекеттик дачаны өмүр бою пайдалануу, бекер мамлекеттик кайтарууда болуу сыяктуу артыкчылыктардан ажыратылышы керек деген эле Токторбаев.

Айта кетсек, Кыргызстанда Роза Отунбаева менен Сооронбай Жээнбеков “экс-президент” деген макамга ээ.