28-февралда президент Садыр Жапаров Сокулук районунда автоунаа чыгаруучу заводдун курулушуна старт берди. “Завод 2024-жылдын август айында ишке кирет” деп маалымдады президенттик администрация. Ал жерден электромобилдер, жеңил автоунаалар, коммерциялык унаалар, атайын техникалар кураштырыла баштамакчы. Долбоор кытайлык компания менен бирге ишке ашырылат, биринчи этапта 115 миллион доллар инвестиция салуу пландалууда. Заводдун кубаттуулугу жылына 80 миңден ашык автоунааны түзөрү маалымдалды. Садыр Жапаров бул долбоор өлкөнүн автоунаа өнөр жайын өнүктүрүүгө, кошумча иш орундарын түзүүгө шарт түзөт деп билдирди. Автоунааларды чыгаруу, импортко автоунаа тетиктерин өндүрүү, Кыргызстандын улуттук автомобиль брендин түзүүгө умтулуш керектигин кошумчалады президент.

Айта кетсек, буга чейин Чүй аймагына Өзбекстан менен биргеликте автоунаа заводун куруу боюнча да сүйлөшүүлөр жүргөн. Экономика министри Данияр Амангелдиев ал заводдун алгачкы унаалары 2024-жылдын алгачкы 6 айында жарыкка чыгышы күтүлүп жатканын айткан эле.