5-ноябрда АКШда өткөн президенттик шайлоодо жеңип чыккан Дональд Трамп өзүнө команда курай баштады. Чет элдик ЖМКлар анын алгачкы дайындоолорун таң калуу менен жарыялап жатышат.

Трамп АКШнын Коргоо министри кызматына телеалпаруучу Пит Хегсетти көрсөттү. Хегсет мурда АКШ армиясынын курамында Ооганстан жана Иракта кызмат өтөгөн. Ал эми Борбордук чалгындоо башкармалыгынын жетекчилигине улуттук чалгындын мурдагы башчысы Жон Ратклиффти дайындады. Ак үйдүн аппарат жетекчисинин орун басарлыгына Стивен Миллер (мурда Трамптын башкы кеңешчиси болгон), улуттук коопсуздук боюнча кеңешчи кызматына Майк Уолтц (мурда Трамптын ушул багытта кеңешчиси болгон, АКШ армиясынын курамында Ооганстан, Жакынкы Чыгышта кызмат өтөгөн), мамлекеттик коопсуздук министри кызматына Кристи Ноем (Түштүк Дакота штатынын губернатору), АКШнын БУУдагы туруктуу өкүлү кызматына Элиз Стефаник (конгрессмен) дайындалды. Ошондой эле Томас Хомен (мурда АКШнын иммиграция жана бажы кызматын жетектеген) АКШнын чек ара коопсуздугу жана миграция саясаты боюнча атайын өкүлү, Стивен Виткофф (ишкер) Жакынкы Чыгыш боюнча атайын өкүл, Илон Маск (ишкер, миллиардер) менен Вивек Рамасвами (ишкер) жаңы түзүлгөн Өкмөттүн натыйжалуулугу боюнча департаменттин жетекчилери болуп иштешет. Тагыраагы, аларга өлкөнү эффективдүү башкаруу, бюрократияны жоюу, чыгашаларды азайтуу сыяктуу милдеттер жүктөлүүдө.