Депутат Исхак Масалиев Жогорку Кеңештин 12-февралдагы жыйынында турак жайды жана автоунааны милдеттүү камсыздандыруу боюнча мыйзамга каршы экенин билдирди. Депутаттын айтымында, аталган мыйзам өлкөнүн Конституциясына каршы келет, анткени Баш мыйзамда “ар бир адам өз мүлкүн эркин пайдаланууга жана ага ээлик кылууга укуктуу” деп жазылган.

– Конституцияда “жаран мүлкүн эркин колдонууга укуктуу” деп жатат. Биз “үйүңдү сатыш үчүн сөзсүз камсыздандыруудан өткөрүшүң керек” деген кошумча талап коюп жатабыз. Кыйналып үй куруп бүткөн адамды “камсыздандыр” деп кыйнайбыз. Бул нерсе ыктыярдуу түрдө болушу керек, милдеттүү кылган туура эмес. Жеке пикиримде, бул абдан чоң бизнес долбоор, жеке менчиктеги камсыздандыруу компанияларына абдан чоң акчаларды беребиз. Мындан казына толбойт, элдин чөнтөгүнө гана күч келет,- дейт Исхак Масалиев.    

Айта кетсек, сөз болуп жаткан мыйзамдын долбоору парламентте 2-окууда каралып, кабыл алынды. Мамлекеттик камсыздандыруу уюмунун маалыматы боюнча, учурда өлкөдө 248 миңден ашык турак жай, 217 миңдей автоунаа камсыздандырылган.