Билим берүү тармагындагы өзгөртүүлөр коомдо талкууну кызытууда. Мисалы, мектептерде “илим” деп аталган жаңы сабакты киргизүү планы. Келерки окуу жылынан тарта мектептерде химия, биология жана физика предметтери мурдагыдай өз-өзүнчө эмес, чогуу окутула баштай турганы жарыяланды. Аталган үч предмет “илим” деген сабактын курамына киргизилип, 1-класстан 9-класска чейин окутулат. Планга ылайык, окуу китеби бирөө болот, ал эми сабакты үч башка мугалим өтөт. 10-11-12-класстарда аталган предметтер кайрадан бөлүнүп, өз өзүнчө окутула баштай турганын айтат Кыргыз билим берүү академиясынын жетекчисинин орун басары Мелис Музулманов.

Балдарды 1-класска кабыл алуу, класстан класска көчүү тартиби боюнча дагы өзгөртүүлөр күтүлүүдө. Жаңы окуу жылында 6 жашка толгон балдар 1-класска кабыл алынып, ал эми 7 жаштагы балдар “Наристе” программасын аяктап, дароо экинчи класска көчүшөт. Ал эми үчүнчү классты аяктагандар бешинчи, 6-классты аяктагандар 8-класска өтүшөт. Билим берүү жана илим министрлиги 12 жылдык билим берүү боюнча жаңы системи толук көзөмөлгө алынарын, билим берүү уюмдары бардык керектүү ресурстар менен камсыздаларын билдирүүдө.