12-мартта Бишкекке Тажикстандын президенти Эмомали Рахмон мамлекеттик сапар менен келди. Бул анын 2022-жылдагы чек ара жаңжалынан кийинки Кыргызстанда жасаган экинчи сапары (биринчиси – 2023-жылы октябрда КМШга мүчө өлкөлөрдүн лидерлеринин саммитине катышуу үчүн Бишкекке келген). Президент Рахмонду “Манас” аэропортунан президент Садыр Жапаров тосуп алды. Мамлекеттик сапар болгондуктан расмий салтанат уюштурулуп, кыргыз жана тажик элдик чыгармалары аткарылган маданий программа көрсөтүлдү. Рахмонду мамлекеттик “Ала-Арча” сейил багын аралатып, кыргыздын каада-салты, улуттук өзгөчөлүктөрү, кооз табияты менен тааныштырышты. Ага комуз белек кылынганы да социалдык тармакка жарыяланган видеолордон улам белгилүү болду. 

Тажикстан президентинин Бишкекке сапарынын негизги максаты – Кыргыз-Тажик чек арасы боюнча келишимге кол коюу, мындан аркы алаканы сүйлөшүү экени айтылып жаткан. Жакында Кыргыз бийлиги чек ара боюнча орток пикир табылганын, чек ара толук макулдашылганын билдирип, тийиштүү келишимдер Жогорку Кеңеште талкууланган. 13-мартта Бишкекте Кыргыз-Тажик мамлекеттик чек арасы боюнча жана башка бир катар келишимдерге өлкө президенттери кол коюшту.  

13-мартта Кыргызстан менен Тажикстандын ортосундагы дээрлик төрт жылдан бери жабык турган “Кайрагач” жана “Кызыл-Бел” өткөрмө пункттары эки өлкөнүн президенттеринин онлайн режимде катышуусунда ачылды. Эксперттер Рахмондун мамлекеттик сапары Кыргызстан менен Тажикстандын мамилелерин жакшыртуу жана Борбордук Азиядагы стабилдүүлүктү сактоо үчүн маанилүү кадам деп жатышат.