Мамлекеттик салык кызматынын мурдагы жетекчиси Алтынбек Абдуваповдун 55 миллион долларлык мүлкү табылды. Бул  тууралуу УКМКнын төрагасы Камчыбек Ташиев 9-июлда Ош шаарында Ош облусунун жетекчилери менен өткөргөн жыйында билдирди. Анын айтымында, Абдувапов 10 жылдан ашуун убакыт салык кызматында иштеген, жеке бизнеси болгон эмес. Ошондуктан 55 миллион долларлык мүлктү кантип топтогону күмөн жаратат дейт атайын кызматтын башчысы.

– Мурдагы анын кол алдында иштеген кызматкерлер айына 50 миңден 100 миң долларга чейин пара берип жүрүшкөнүн айтышкан. Биз анын бүт мүлкүн конфискациялайбыз, ал сөзсүз сот алдында жооп берет. Ал мындан ары кедей адамдардын бири болот,- деди Ташиев. Ташиев чиновниктер “мурдагыдай сотторду сатып алып, камактан бошоп чыгып, кайра кымбат унаа айдап жүргөн заман бүткөнүн” белгиледи.

Эске салсак, Алтынбек Абдувапов жана анын орун басары Исламбек Кыдыргычов 2024-жылдын 6-декабрында кылмышка шектелип кармалып, камакка алынган. Алар кызматтык абалынан кыянаттык менен пайдаланышкан жана электрондук товардык-транспорттук коштомо-кагаз боюнча коррупциялык схемага катыштыгы бар деп шектелүүдө. УКМКнын маалыматы боюнча, бул схема мамлекетке 3,2 миллиард сом зыян алып келди.