Маалымат айдыңында УКМКнын төрагасы Камчыбек Ташиев чет өлкөлүк футбол клубунун карызын төлөп берип, ал клубдун 10 пайыз акциясын сатып алды деген маалымат тараган.

15-июлда Кыргыз футбол союзу бул маалыматты төгүндөп, Камчыбек Ташиевдин Словакиядагы “Тренчин” футбол клубунун 10 пайыз акциясын сатып алды деген маалымат чындыкка дал келбесин белгиледи. “Камчыбек Ташиев эч бир чет элдик же жергиликтүү футбол клубунун акциясына ээ эмес. Анын ичинде “Тренчин” клубу да бар”,- деп жазылат билдирүүдө.

Кыргыз футбол биримдиги белгилегендей, учурда союз эл аралык кызматташтыкты кеңейтүү багытында иш алып барууда. Маалыматка таянсак, учурда “Тренчин” клубу менен өнөктөштүктүн алкагында эки кыргыз футболчусу аталган клубда даярдыктан өтүп, бир машыктыруучу Словакияда окууда жүрөт. Ошондой эле футбол биримдиги “Барселона” клубу менен биргеликте Жалал-Абадда “Барса” академиясын ачуу иштерин жүргүзүүдө жана Англиянын “Астон Вилла” клубу менен байланыш түзүлгөнүн кошумчалады.