Жалал-Абад шаарында өлкөнүн Жаза аткаруу мамлекеттик кызматынын Коргоо жана коштоп жүрүү департаментинде кызмат өтөп жаткан 2005-жылы туулган жоокер 16-июль күнү асынып алган абалда табылды. Бул маалыматты күч түзүмдөрүнүн өкүлдөрү тастыкташты. Маркумдун сөөгү түзүмдүн имаратындагы бөлмөлөрдүн биринен табылган.

Алдын ала маалыматтар боюнча, жоокер өз жанын кыяр алдында коштошуу катын жазып калтырган. Катта анын мындай кадамга баруусуна себеп болгон нерсе катары “уставга каршы мамилелер” башкача айтканда, кызматтагы улуураактар тарабынан көрсөтүлгөн зомбулук жана басым айтылган.

Учурда бул окуя боюнча Аскер прокуратурасы тарабынан иликтөө иштери жүргүзүлүп жатканы айтылды. Маалыматка ылайык, кылмыш иши козголуп, жоокердин өлүмүнө алып келген шарттар жана кызматкерлердин аракеттери териштирилүүдө. Мекеме ичиндеги видеокөзөмөл материалдары жана күбөлөрдүн көрсөтмөлөрү иликтөөгө алынган.

Ошондой эле тиешелүү мекеме, маркумдун үй-бүлөсүнө психикалык жана юридикалык жардам көрсөтүлөрү айтылды. Коомчулукта бул окуя армиядагы уставдан тышкары мамилелерге каршы чара көрүү зарылдыгын дагы бир жолу эскертти.

Белгилей кетсек, Кыргызстанда мындай окуялар буга чейин да катталган. Адистер армияда адам укуктары жана коопсуздук маселеси дагы деле жетиштүү деңгээлде чечиле электигин белгилешет. Жоокердин өлүмү армиядагы тартип жана адам укуктары маселесин кайрадан күн тартибине алып чыкты.