Өзгөндөн чыккан полковник бар, Талант Разаков деген. Убагында УКМКда кызмат кылып, анан эс алууга чыккан. Ошол адамдын “Ош коогалаңы” деген китеби колума тийгени качан. Автордун ал китеби 1990-жылдагы Ош окуясы жөнүндө таамай, курч жазылган эле, эмнегедир китебинин бет ачарын быйыл жасады. Бирок кеп бул китепте эмес, автору белгисиз, кыргызды көркоо көрсөткөн башка китепте болууда.

КЫРГЫЗДАРДЫ КӨРКОО КӨРСӨТҮПТҮР
Аптанын башында депуттар “Көркоонун маалы” деген китептин чоо-жайын угуп дүрбөлөң түшүп калышты. Былтыркы Ош окуясы боюнча чагымчыл аракетте жазылган китеп орус тилинде жарык көрүп, мукабасына чөөнүн сүрөтү түшүрүлүп, 120 беттен турат. Мазмунуна келсек, Июнь коогалаңында 2000ден ашуун өзбек курман болгондугу тууралуу жазылган да, каза тапкан кыргыздар жөнүндө ооз ачылган эмес дейт. Анан да «Чүйдүн Маевка, Искра жана Петровка айылдарында орустар, түрктөр, дунгандар жана күрддөр улутчулдуктун курмандыгы болушту» деген таризде бурмаланган, Ош окуяларына эч кандай тиешеси жок маалыматтарды да кыстарып кеткен. Депутаттардын айтымында, автору, кайсы жерден басылып чыкканы белгисиз “Көркоонун маалы” Кыргызстандан сырткары КМШда, Европанын айрым өлкөлөрүндө ар кайсы тилдерге которулуп, сатылып жатат. “Кадыржан Батыров сыяктуу качкындардын колдоосу менен Финляндияда басылып чыгарылышы мүмкүн” деген божомолдор бар.
Бул тууралуу эл өкүлү Жылдыз Жолдошева: “Китеп 400 миң нуска менен чыккан. Мындан тышкары китеп менен кошо компакт-дисктер таркатылууда. Китепти дагы жайылтуу үчүн Өзбекстандан чыккан сепаратисттер миллиондогон доллар чогулткандыгы, ал гана эмес, жакынкы күндөрү китептин Англия менен Түркияда англис тилинде чыгарылары тууралуу маалымат бар”,- дейт. Депутат айым бул китепти Москвадан алгандыгын кошумчалады.

КИТЕПТИ БАСУУГА ЖАНА ЖАЙЫЛТУУГА ЖОЛ БЕРИЛБЕЙТ!
Чет жердик маалымат каражаттары ансыз деле Ош окуясы тууралуу бир беткей маалымат таратып, кыргыз улутун чөө тургай бөө кылып көрсөткөнү кимге жашыруун дейсиз. Өзбек эле эмес, миңдеген кыргыздын каны аккан кейиштүү окуя мына ушундай чагымчыл күчтөрдүн айынан болгонун кыргыздар күйпөлөктөп эле айтып кала берет окшойбуз дегенбиз. Бирок тиешелүү тармактар бул боюнча чечкиндүү аракеттерди баштады. Чуулгандуу китептин чоо-жайын иликтөө үчүн КРСУ, БГУ жана Улуттук илимдер академиясынын мыкты адистеринен турган атайын эксперттик комиссия түзүлдү. “Ал китептеги сүрөттөр бир беткей маалыматты камтыган. Мазмуну улут аралык чагымчылдыкка үндөйт. Бул китепти басууга жана жайылтууга жол бербөө керек” деген жыйынтыкка келди. Ушундан улам Башкы прокуратура китепти мыйзамсыз чыгарылганы үчүн сотко өткөргөн. Иликтөө иштери УКМКга жүктөлдү.