2-июндагы ЖКнын чоң отурумунда “Ата Мекендин” депутаты Болот Шер генерал-лейтенант наамы менен депутаттык кол тийбестиги жана партиялык мүчөлүгүн убактылуу алып салууну суранды. Бул өтүнүч жөн жеринен чыккан жок. Анткени парламентте Ош жана Жалал-Абад облустарындагы Июнь окуясын иликтеген депутаттык комиссиянын жыйынтыгы каралган. Жыйында депутаттар тарабынан “коогалаңга ким күнөөлүү жана алар жазасын алышабы?” деген суроолор берилди.
Ошол кезде ИИМди жетектеп турган Болот Шер күтүүсүздөн сөз алып, президент берген генералдык чининен баш тарттаарын билдирди. Спикер Ахматбек Келдибековдон жана «Ата Мекен» партиясынын лидери Өмүрбек Текебаевден ошол кездеги иш-аракетине юридикалык баа берилгенге чейин депутаттык кол тийбестигин ала турууну, ошондой эле партиядагы мүчөлүгүн токтото турууну суранды. “Мен ошол учурда Ички иштер министри болуп турганмын. Андыктан каза болгон 447, жарадар болгон 2 миңдей кишинин жана жалпы эле кыргыз элинин алдында кечирим сурайм”,- деди эл өкүлү.
Учурунда Бакиевдерден кооптонуп, эч бирөө ИИМди жетектөөгө батынбай турган кезде ден соолугунун өтө чабал экендигине карабай милицияны башкарып, өлкөдөгү курч абалды калыбына келтирген Болот Шердин бул кадамы анык жигиттик болду. Айрымдар өз дарегине ачыктан-ачык ат көтөргүс айыптар айтылса деле кылы кыйшайбай кызматына жабышып, өздөрүн акча аркылуу актап жатышпайбы. Эми бул азаматтын каршылаштары аны каралоо аракетинде «ансыз деле аны генерал катары кабыл алышчу эмес» же «түштөн кийин актанууда» деп чыгышары анык.