Октябрда өтүүчү президенттик шайлоонун 1 айга артка жылдырылышынын себеби эмнеде? Муну менен шайлоодо ат салышчу саясатчылар өз кызыкчылыгын коюп жатышабы же президент Роза Отунбаева тактыдан кетүүнү каалабай жатабы?

«ПРЕЗИДЕНТ ИНТРИГАНДАРДЫН СӨЗҮНӨ КИРИП...»
2010-жылдын 27-июндагы жалпы элдик добуш берүүнүн чечими менен президенттик шайлоо быйыл октябрь айында өткөрүлмөк. Эми шайлоону ноябрда өткөрүү сунушталууда. Шайлоонун кечиктирилишине ар ким ар кандай баа берип жатат. Бири «шайлоонун алдында айрым президенттикке талапкерлер саясий упай топтоого жетишпей калуудан чочулап, жылдырышууда» десе, айрымдар «президент тактысынан кеткиси жок» дешүүдө.
23-июндагы ЖКнын пленардык жыйынында бул маселе каралды. Анда “Ата Мекен” фракциясынын лидери Өмүрбек Текебаев: “Жогорку Кеңеш президенттик шайлоо өз мөөнөтүндө өтсүн деп болгон аракетти кылды, мыйзамдарды кабыл алды. Ал эми президент Роза Отунбаева «интригандардын сөзүнө кирип» шайлоолор жөнүндө мыйзамдарды кабыл алууну 3 айга создуктурду. Учурда шайлоонун артка жылышына парламенттин күнөөсү жок”,- деп билдирди.

«ШАЙЛООНУ КИЙИНКИ ЖЫЛГА КАЛТЫРАЛЫ»
Ушул эле жыйында ЖКнын төрагасы Ахматбек Келдибеков «Ата Журт» фракциясынын кечээки жыйынында депутат Камчыбек Ташиевдин «президенттин мөөнөтүн дагы бир жыл узартып коёлу» деген сунушун карабайлыбы?..» деген оюн какшык иретинде айтканга үлгүрдү.
Эске салсак, 22-июндагы «Ата Журт» фракциясынын жыйынында Ташиев: «Президенттин шайлоолор боюнча каршы пикирлери өтө деле орчундуу эмес. Бул жерде саясий оюндар болуп жатат. Андыктан президенттик шайлоону кийинки жылга калтыралы. Конституцияны өзгөртөлү»,- деген болчу.
Шайлоонун кечеңдеп жатышы боюнча Өкмөттүн Жогорку Кеңештеги өкүлү Данияр Нарымбаев: «Өкмөт, башта белгилегендей, президенттик шайлоо октябрь айында өтсүн деген пикирде болчу. Бирок Борбордук шайлоо комиссиясына жаңы системада жоопкерчилик күчөтүлгөндүктөн, шайлоо комиссияларынын мүчөлөрүн окутканга, үйрөткөнгө убакыт керек деп ноябрда өткөрүүнү сунуштаган. Бул сунуш макулдашуу комиссиясы тарабынан жактырылып, президенттик шайлоону 20-ноябрда өткөрүү каралып жатат»,- деп билдирди. Ошондой эле эски тартип боюнча, республикалык бюджеттен президенттик шайлоону өткөрүүгө 177 миллион сом каралгандыгын жана жаңы кабыл алынган шайлоо мыйзамына ылайык кошумча 130 миллион сом бөлүнгөнү жаткандыгын айтты.
Роза Отунбаева болсо эл алдында берген убадасына бекем туруп, айтылган мөөнөттө президенттик кызматты таза шайлоонун негизинде тандалган президентке өткөрүп бере тургандыгын белгилеп келет.