Эмгек, ишке орноштуруу жана миграция министрлиги менен БУУнун өнүктүрүү программасы биргелешип жаштардын арасында жумушсуздукту жоюу үчүн атайын долбоордун аягына чыгышты. 26-августта Бишкек шаарынын №95-кесиптик лицейинде 200дөй тикмечи үч айлык окуусун аяктады. Аларды ар кандай фирмаларга жумушка орноштурууда долбоордун негизинде жардам беришүүдө.
“Жакын арада ушундай эле долбоорлор Ош жана Жалал-Абад облустарында башталат”,- дейт аталган министрликтин башчысы Айгүл Рыскулова.
Ак-Босого, Көлмө жана Калыс-Ордо жаңы конуштарында жашаган тикмечиликти аяктагандар окуу учурундагы даярдаган кофта, шым жана башка кийим-кечелерди Ош жана Жалал-Абад шаарларына гуманитардык жардам кылып жөнөтүшкөн.
Ушул эле долбоордо тигүүчүлөрдөн сырткары дагы 200дөй жаштар ширетүүчү, жыгач уста жана куруучу кесибине ээ болуп чыгышкан.