Шайлоого катышкан жана анын алдын ала берилген жыйынтыгына макул эместердин тобу жаңы “Жалпы улуттук конгресс” бирикмесинин түзүлгөнүн билдирди. Аталган топко “Мекен ынтымагы”, “Замандаш”, “Акыйкат”, “Кыргызстан элдеринин союзу”, “7-апрель жаштар кыймылы”, Кыргызстан республикалык элдик партиясы, “Каганат” жана “Ак санат” кирген.
“Акыйкат” партиясынын лидери Аликбек Жекшенкулов “Кыргызстан бандиттик өлкөгө айланып кетүүсү мүмкүн” деген тынчсыздануусун билдирди. “Анткени шайлоо учурунда кримчөйрө тарабынан басым болгондугу баарыбызга эле байкалды”,- дейт Аликбек мырза. Мурунку тарапташтары менен шайлоого чейин бир туунун алдында бириге албагандарына өкүнгөнүн да жашырган жок. Ал: “Учурунда амбициялардын айынан бириге албадык. Чоң кемчилик кетиргенибизге карабастан, бул дагы саясий өнүгүүнүн бир көрсөткүчү”,- деп өзүн жубатууда.