Куш тилиндей кабарлар

• ...президент Роза Отунбаева Нарын районундагы 118 гектар жерди “Рокизол” ЖЧКсына пайдаланууга өткөрүп берди. Аталган мекеме “Сары-Жел” жана “Кум-Бел” кенинде алтын жана вольфрамды кайрадан иштетип чыкмакчы.
• ...Башкы прокуратура экс-президент Курманбек Бакиевдин жакындарынын жана туугандарынын тиешеси бар деген 40 кылмыш ишин сотко ашырды. Анда 68 кишиге айып тагылса, анын ичинен 25ине эл аралык издөө жарыяланган.
• ...Мамлекеттик байланыш агенттигинин директору Байыш Нурматовдун айтымында, 3G стандартын (мобилдик байланыш технологиясынын 3-мууну) киргизүү боюнча өкмөттүн токтому макулдашылып жатат. Бирок токтомду күтпөй эле, Beeline, MegaCom жана Fonex уюлдук операторлору 640 миң долларга 3G стандартын сатып алышты.
• ...Кыргызстан дале дүйнөдөгү паракорчулукка баткан өлкөлөрдүн бири боюнча калууда. Бул тууралуу эл аралык “Transparency International” уюмунун кезектеги баяндамасында айтылат. Ошентип, биздин мамлекет паракорчулуктун гүлдөп-өнүгүшү боюнча 178 өлкөнүн ичинен 14-орунду ээледи.
• ...Баткен облусуна караштуу Кызыл-Кыя шаарында 27-октябрь күнү милиция кызматкерлерине белгисиз адамдар тарабынан ок атылды. Бул окуянын жыйынтыгында милиция кызматкерлери Кулан Бердалиев менен Кылыч Исманов каза болушкан.
• ...“АзияУниверсалБанк” банкрот болду” деп жарыяланды. “Бул банк экс-президенттин үй-бүлөсүнө тиешелүү” деген имиштер айтылып келген. Ошентип, кыска убакыттын ичинде гүлдөп-өнүккөн банктын “ичер суусу” да аяктады.
• ...Кыргызстанда 11 газ жана 11 нефти кени бар. Эгерде нефти кенинин запасы 13 миллион тоннага чукул болсо, ал эми газдын көлөмү 7,5 миллион метр кубга чейин жетет.