Президент Роза Отунбаева 26-октябрь күнү экинчи жолу 5 партиянын лидерлери менен резиденцияда жолугушту. Ага Өмүрбек Текебаев, Өмүрбек Бабанов, Камчыбек Ташиев, Феликс Кулов, Акылбек Сариев жана президенттик администрациянын жетекчиси Эмилбек Каптагаев катышты. Ал эми Алмазбек Атамбаев жолугушууда болгон жок.
Жолугушуудан кийин президент айым “Кабарлар” радиосуна маек куруп, шайлоонун расмий жыйынтыгы ушул аптанын аягына чейин элге жарыяланарын билдирди. “Ошентип, “качан бүтөт, кечеңдетип жатышат...” деген сөздөргө чекит коюлат. Кудай буюрса, эмки жумадан баштап парламент иштей баштайт”,- деди Роза Отунбаева.