Акыйкатчы Турсунбек Акун Ош жана Жалал-Абад облустарында болуп өткөн июнь окуялары боюнча иликтөөсүн алгачкылардан болуп жарыялады. “Түштүк окуясын Кадыржан Батыров, Жалаллидин Салахутдинов, Иномжан Абдурасулов өңдүү өзбек улутундагы адамдар башташкан. Кийин айыпты Өзбекстандын президенти Ислам Каримовго оодара салууну ойлошкон. Алар каржылап, кыргыз менен өзбекти бири-бирине тукурган. Чагымчылардын максаты кагылыштан пайдаланып, түштүктө автономия түзүп, өзбек тилине расмий статус берүү болгон”,- дейт акыйкатчы. Ошентсе да Турсунбек Акундун айтымында, кандуу окуяга кыргыздар дагы, өзбектер дагы күнөөлүү.