ЖКнын “ар-намыс­чы” депутаты Акылбек Жапаров иш башталгандан бери кесиптештеринен айырмаланууда. Өткөн аптада депутаттарга жума күнү намаз окууга атайын убакыт бөлүп берүүнү суранса, азыр Каржы министрин “мугалимдердин айлыгын көтөрүүгө каражат табасың” деп жарга такап турган кези. “Кирешени бекитпегиле! Мен аны баары бир таап алам”,- деди депутат. Ал “Манас” аэропортунан түшкөн кирешени (17 миллион доллар) мугалимдердин маселеси үчүн сарптоону сунуштады.
Бакиевдин мезгилинде министр жана вице-премьерлик кызматтарды аркалаган Акылбек Жапаров эми түштүктү калыбына келтирүү боюнча дирекциянын башчысы Жантөрө Сатыбалдиевге ишенбей отурат. Акылбек Жапаровдун айтымында, аталган дирекцияга жөнөтүлгөн каражатты мэрияга өткөрүп берүү керек. “Эртең Жантөрө Сатыбалдиев башкарган мекеме жоюлса, ким жооп берип калат? Андыктан акча каражаттары үчүн жоопкерчиликти мамлекеттик органдын адамы же шаар башчы Мелис Мырзакматов алышы керек”,- дейт Жапаров мырза.