Аптанын окуясы

«8 айдан бери Кыргызстанды оор мезгилде башкарып келген президент Роза Отунбаева кадыр-барктуу «Нобель» сыйлыгын алууга татыктуу» дегендер болууда.
Борбордук Азиянын адам укуктары боюнча мусулмандардын комитети жана Казакстандын мусулмандар биримдиги президент Роза Отунбаеваны “2010-жылдын эң мыкты мамлекеттик ишмери” деп аташты. Алар келерки жылы президент айымды “Нобель” тынчтык сыйлыгына талапкер катары көрсөтүүнү сунушташууда.
“Демократиялык оппозицияны башкарган Роза Отунбаева паракорчулукка малынган жетекчиликти бийликтен кетире алды. Андан сырткары өлкөнү жарандык согушка жеткирген жок”,- дешет демилгечилер. Андыктан алар коомдук-саясий ишмерлерди бул демилгени колдоого чакырышты.
Ошондой эле Өзбекстандын президенти Ислам Каримов дагы Кыргызстандын Ош жана Жалал-Абад облустарындагы коогалаңды иликтеген Улуттук комиссия тарабынан мамлекеттик сыйлыкка көрсөтүлдү. Сыйлык өзбек президентине этникалык кагылышты болтурбоого жана токтотууга кошкон салымы үчүн берилмекчи.