Мен көлгө жалгыз келип, байыр алдым,
Тургуздум махабаттын пайдубалын.
Жаштыгым татаал жолдон жаңылышып,
Долондон канатымды кайрып алдым.

Кумдан көп биздин күндөр, өткөн-өткөн,
Келээрмин аман болсом да бир көксөө.
Азыр мен жалгыз учкан, ак куу болуп,
Баратам бакыт издеп Памир көздөй.

Сен эзсен кусалыкка сезимимди,
Жаздагы салкын желден, кабар улай.
Мен жокто сылай жүр деп саамайыңан,
Тапшырдым Ысык-Көлдүн шамалына.

Жээгине жалгыз келип байыр алдым,
Тургуздум махабаттын пайдубалын.
Жаштыгым татаал жолдон жаңылышып,
Долондон канатымды кайрып алдым.

Жан дүйнөмдө күнүм бар тийип турган,
Жүрөгүмдө сүйүүм бар сүйүп турган.
Кулагымда сыйкырдуу добушуң бар,
Каным менен айланып жүрүп турган.

Карегимде сүрөтү жашайт анын,
Карайм дагы кайгымды азайтамын.
Алда кайдан агылып келип турган,
Сүйүүсүнөн дилимди тазартамын.

Башкача бир жан дүйнөм эргип анан,
Арууланам, эс алам, сергийм анан.
Жүрөйүн деп мен дагы жүрөгүңдө,
Бүт дүйнөмдү тартуулап бердим анан.
Жүрөйүн деп мен дагы жүрөгүңдө,
Бүт дүйнөмдү тартуулап бердим анан.

Асылым, үшкүрүнүп кыйнабачы,
Алданып үмүтүмө ыйлабачы.
Жамандап жазыгы жок бир пендени.
Жанар тоо атылгандай кыйрабачы.

Кайырма:
Эми сен саргайгансып санаа тартып издебечи,
Эми сен зарлангансып заарың чача тиктебечи.
Куш болуп боосун тытып учуп кеткен,
Көзүмдөн махабатты издебечи.
Издебечи!

Асылым, неге мынча үшкүрүндүң?
Сүйүүнүн кайгысыбы үшкүрүгүң?
Жалынба, жалдыраба, кайра-кайра.
Алданбайм алданбаймын, жаным сага.

Кайырма:
Эми сен саргайгансып санаа тартып издебечи,
Эми сен зарлангансып заарың чача тиктебечи.
Куш болуп боосун тытып учуп кеткен,
Көзүмдөн махабатты издебечи.
Издебечи!

Алладан кийинки чеберим, жан ата жан жүрөгүм.
Санаамдын күч кубат демисиң, сүрөөнсүң тирегим.
Калтырбас аязга, ызгаарга, таянар тоо аскарым.
Жан атам, жанымда сиз барда жапжарык ар таңым.

Кайырма:
Ар качанда бийик көрөмүн мен башкадан.
Менин атам, менин атам, эң жакшы адам,
Менин атам, менин атам, эң жакшы адам.

Ыр менен кабыл ал даанышманым,
Кызыңдын сый-урматын.
Атакем айкөлүм, асылым, эң мыкты устатым.
Эңсейт да кызына ар ата, элде жок бак орношун,
Мен үчүн, жан ата, бийиктик өзүңдөй болгону.

Кайырма:
Ар качанда бийик көрөмүн мен башкадан.
Менин атам, менин атам, эң жакшы адам,
Менин атам, менин атам, эң жакшы адам.

Бийигиңе сөз жеткис, аруу жансың ай,
Асылындай асылдын, кубатымсың жан курбум.
Кайрыгындай ушул жакшы ырдын,
Жарык чачып дайыма, жөлөгүмсүң ай,
Тирегиндей бактымдын, жанымдасың жан курбум.
Тартуусундай ушул тагдырдын,

Кайырма:
Аа-ай, кыйбасымсың, сырдашымсың жан курбум,
Кайрыгысың биздин жакшы ырдын.

Ачып сага бүтүндөй жүрөгүмдү ай,
Тең бөлүшкөн сырдашым, көңүл баккан жан курбум.
Бийик сага сыйым-урматым.
Бакыт берген сезимге балалыктын ай,
Бирге бастык жылдарын бул өмүрдүн жан курбум.
Бир көрөлү дагы жыргалын.

Кайырма:
Аа-ай, кыйбасымсың, сырдашымсың жан курбум,
Бир көрөлү өмүр жыргалын.

Аа-ай, кыйбасымсың, сырдашымсың жан курбум,
Бир көрөлү өмүр жыргалын.

Аа-ай, кыйбасымсың, сырдашымсың жан курбум,
Кайрыгысың биздин жакшы ырдын.
Кайрыгысың биздин жакшы ырдын.