Моймолжуган көзүңдөн айланайын,
Узун кара чачыңа байланайын.
Жалгыздыктан тажасаң келгин бери,
Жаман суук сөздөрдөн далдалайын.

Кайырма:
Эркелечи чарчабай, эркелечи,
Эс алчу кез биз үчүн эрте дечи.
Эркелечи чарчабай, эркелечи,
Эс алчу кез биз үчүн эрте дечи,
Эркелечи.

Жан бирге жаш селки ала-тоолук,
Эркелетчи, наристем, бала болуп.
Бул дүйнөдө күн жеткис жыргалымдай,
Жарык чачкан ак жүзүң айдай толуп.

Кайырма:

Түйшүк тартсам ойго келбейт эмнелер,
Тирүүлүктө толгонобуз пенделер.
Өмүр бою басып өткөн жолуңар,
Көз ирмемде үзүлгөнүң тең келер,
Көз ирмемде үзүлгөнүң, көз жумганың тең келер.

Бул бүркүмдүн билбей канча калганын,
Көкөй кескен бүтпөйт асыл арманы.
Бир жаздансаң бир ууч муздак топурак,
Басып кетет тирүүлүктүн салмагын,
Басып кетет тирүүлүктүн, бул жашоонун салмагын.

Баркын билсең кадыр менен көңүлдүн,
Бөксөрбөгүн, ташкындагын, көбүргүн.
Ансыз деле күн чыкканы, батканы,
Аралыгы өмүр менен өлүмдүн.
Андыктан сен бөксөрбөгүн, ташкындагын, көбүргүн.