Жаңылдыңбы, жаздыңбы?
Акылыңдан аздыңбы?
Адашарың билдиңби же
Билбей ката бастыңбы?
Жалган дүйнө ушундай, ай,
Кээде күлүп, кээде ыйлай.
Өмүр өтүп баратканын
Сезбейсиң го байкабай.

Кайырма:
Тамчы, тамчылады жаштарың ыйлай, ыйлай,
Тамчыланып жүрөк муңдары үн угулбай.
Кайра баарын баштан баштайлы дебе, садага,
Өзүңдү өзүң сен алдаба.

Бүгүн калдың сен жалгыз,
Ыйлап турасың алсыз
Өткөн күнгө өкүнүп, ий,
Аттиң кылып аргасыз.
Болду, болду ыйлаба,
Ыйлаганда жок пайда.
Кетирген сен каталарың
Кайталабагын кайра.

Кайырма:

Эрмегим элең эркелеп, кызым,
Колумдан кеттиң эртелеп, кызым.
Теңиңе кошуп узатып жатам,
Теңирим бакыт берсе деп, кызым.

Кайырма:
Ай, жыл да өтөр,
Улана, кызым.
Турмуш бул татаал,
Убара, кызым.
Атадай камкор болуп жүргүн деп,
Тапшырдым сени кудама, кызым.

Кайырма:
Бой тумар сындуу,
Көрүнгөн кызым.
Бой жеткен кезде,
Бөлүнгөн кызым.
Бакыттын кушун колуңа кармап,
Бактылуу өткүн өмүрдөн, кызым.

Кайырма:
Тартылган үйгө желегим, кызым,
Таарынып келем дебегин, кызым.
Ак тилегимди ыр менен сунуп,
Арнаган сага белегим, кызым.

Кайырма:

Аба, суудай керек болдуң демиме,
Зар болдум да сендиктеги мээримге.
Бакыт таптым, сүйүү таптым дегиче,
Муңду салып кете бердиң сезимге.

Кайырма:
Биз таанышкан ошол учур эсимде,
Кар учкундап туман баскан кез эле.
Ойлобопмун ал тууралуу ошондо,
Кайгы салып кетээриңди сезимге.

Гүл бак элең сен мен үчүн дайыма,
Кумар канбай калды сенин жытыңа.
Азап, кайгы, муңду жана башкасын,
Айла таппай жазып калдым ырыма.

Аруу болгон кылыгыңды сагынам,
Кундуз элең, кымбат элең баарынан.
Там тум баскан сезимимди ыйлатып,
Тар көчөгө таштап кеттиң таарынам.

Үйүңөрдө жанып турсун дайым жарык,
Үмүт, тилек, максаттар да аткарылып.
Бардык жерде тосот бүгүн эл кубанып,
Жаңы жылды, жаңы күндү жаңыртып.
Дасторкондор толуп турсун түркүн даамга,
Достор келип куттукташат бул майрамда.
Элим-жерим үчүн жакшы бата тилейм,
Тынчтык болсун бул дүйнөдө көп кылымга.

Кайырма:
Жаңы жыл, жаңы жыл
Болсун бизге, жакшы жыл.
Жаңы жылда көрүп сый,
Арнашалы жакшы ыр.

Балатыны кооздоп түрлөп бүгүн мына,
Балакайлар ойноп тынбайт аны айлана.
Аяз ата, аяз кызды чакырышып,
Ыр-күлкүгө толот жер шар тебип чана.
Аппак кардын тазалыгы көз уялтат,
Айлананын сулуулугу суктандырат.
Биз күткөн үй-бүлөлүк бул майрамдын,
Түндө жанган салюттар да көркүн ачат.

Кайырма:
Жаңы жыл, жаңы жыл
Болсун бизге, жакшы жыл.
Жаңы жылда көрүп сый
Арнашалы жакшы ыр.