Карлыгач канат карагым.
Кадырлуу болсун кадамың
Бактылуу кылсын түбөлүк,
Баш кошуп жаткан адамың.

Айланам алтын чырагым
Аңкыган жыттуу бурагым.
Атаңдай сыйлап-урматтап,
Алдынан өтпө куданын.

Бакыттын учкан кушундай,
Барагой турмуш ушундай.
Өксүтпөй баккын апаңды,
Өзүнүн тууган кызындай.

Калтырбай ушак-айыңга,
Кадырлуу болгун кайыңга
Чыккан кыз чийден тышкары,
Чынардай көктөп, байырла.

Бактылуу болгун жан кызым,
Балбылдап жанган ай кызым.
Бактыңа жазган бүлөңдү,
Бапестеп сыйлап ал кызым.
Барагой, эми бар кызым.

Санаалар уюп, сайылып канжар сезимге,
Сагыньп сени, саргайып жүргөн кезимде.
Ак толкун болуп, ак шоокум болуп,
Көрүнчү мага, периштем.

Көңүлүм эңсеп тайызды эмес, тереңди,
Түндүктүн суугу турганда каптап денемди.
Аскарым болуп, ак жалын болуп,
Жылытчы мени, периштем.

Жетем деп улам жылт эткен максат соңунан,
Бараткан кезде чырмалып кайгы торуна.
Карекке конуп, үмүтүм болуп,
Жанымда турчу, периштем.

Азыр сен алыстасың, менден узап,
Арадан өтсө дагы канча убак.
Элесиң эстен кетпей туруп алды,
Жүрөгүмө салдың беле,
Салдың беле кандай тузак?

Жазылдың бактысына, таалайына,
Табылдың кандай жандын маңдайына?
Сүйдүрүп жүргөнүңдү сездиң бекен,
Элесиңди тумар кылып,
Тумар кылып, жүрөгүмө.

Сезимди сооротомун, унуткун деп,
А бирок, чындыгында, андай эмес.
Мен сенден үмүтүмдү үзсөм дагы,
Жүрөгүмдө жашай берет,
Жашай берет сүйкүм элес.

Кеттим дейсиң келбес болуп түбөлүк,
Кош дегенге колуң бербей түнөрүп.
Кармай албай калтыраган денемди,
Калдым артта айтар сөзүм түгөнүп.

Алыстаса аралыктар узарып,
Сенделемин сендик ойго тушалып.
Сезген жоксуң жолугууга кайрадан
Сени мага алпкелерин кусалык.

Аркандалган азаптарга тордолуп,
Арман толгон аалам сага тар болуп
Калган кезде билдиң бекен мени издеп
Каларыңды карааныма зар болуп.

Жыпар жыт каптап,
Дүйнөнү жибек жел эзген.
Жүрөгүм чакмак,
Жүлүндөн бери "дүрт" эткен.
Сел болуп каптап,
Нур болуп аппак,
Түшүмө кирдиң түндө сен.
Түшүмө кирдиң түндө сен.

Ак кайың бүрдөп,
Ажайып аалам тиктесем.
Толкуну түрмөк,
Айдың көл мына издесем.
Токтолбо жүр деп,
Толкунга мин деп,
Түшүмө кирдиң түндө сен.
Түшүмө кирдиң түндө сен.

Ак куулар учуп,
Канатын күүлөп бийиктен.
Көңүлдү буруп,
Кайберен жүргөн бийик бел.
Көл болуп чалкып,
Жыт болуп аңкып,
Түшүмө кирдиң түндө сен.
Түшүмө кирдиң түндө сен.