Кызыл кийсең жарашып,
Кылчак-кылчак карашып.
Кызгалдактай кулпурасың, жаным
Кыштак баары сага ашык.

Кайырма:
Ай сары кыз, сары кыз,
Жүрөгүмө дары кыз
Кулпунайдай кулпурасың, жаным
Курбалдашым сары кыз.
Сары, сары, сары кыз
Жүрөгүмө дары кыз
Кулпунайдай кулпурасың, жаным
Курбалдашым сары кыз.

Жашыл кийсең жарашып,
Жалт-жалт сени карашып.
Улуу-кичүү баары бирдей сүйүп,
Урушабыз талашып.

Кайырма:

Кыялымда өзүңдү,
Кыса кармап энчилейм.
Түбөлүккө колуң бересиңби,
Түшүн мени келчи дейм.

Кайырма:

Сапырылган сары жалбырак,
Санааларга мени азгырат.
Терезеңе келип тигилсем,
Үнсүз дарак тиктейт жалдырап.

Кайырма:
Жаш жүрөгүм мынча кайгырды,
Көңүл кушун кимге алдырды.
Күзгү нөшөр тынбай төгүлөт,
Көздөрүңдөн жааган жамгырбы?

Теребел да мынча көңүлсүз,
Теректер да ойдон бөлүнгүс.
Тегерете курчап буюмдар,
Термелише тиктейт өзүңсүз.
Кайырма:

Болом деген өзүң түбөлүк,
Асман дагы бүркөө түнөрүп.
Өзүң тургай атың укканда,
Жүрөгүмдөн турчу гүл өнүп.

Коңур күздө түшөт сары жалбырак,
Келчү жолуң күтөм карап жалдырап.
Сүйүүңөргө суктандым мен дегенсип,
Көк асмандан тамчы, тамчы жаш кулап.

Жолугууга ак көйнөгүң кийип кел,
Жоодур карап бул жашоону сүйүп кел.
Кабагыңдан капалыгың сездирбей,
Жарык маанай, жаркылдап сен күлүп кел,
Бүгүн мага ак көйнөгүң кийип кел.

Сени күтүү - зор бакыттын дал өзү,
Сени күтүү - ак сүйүүнүн өзөгү.
Ал ансайын сендик сезим артылып,
Сага болгон махабатым күчөдү.

Жолугууга ак көйнөгүң кийип кел,
Жоодур карап бул жашоону сүйүп кел.
Кабагыңдан капалыгың сездирбей,
Жарык маанай, жаркылдап сен күлүп кел,
Мага жаккан ак көйнөгүң кийип кел.

Батыраак кел күзгү жаанга карабай,
Басалы бул эски бакты аралай.
Сапырылган жалбырактар шуудурап,
Кыялымды алып учат сабалай.

Жолугууга ак көйнөгүң кийип кел,
Жоодур карап бул жашоону сүйүп кел.
Кабагыңдан капалыгың сездирбей,
Жарык маанай, жаркылдап сен күлүп кел.

Мага жаккан ак көйнөгүң кийип кел,
Жоодур карап бул жашоону сүйүп кел.
Кабагыңдан капалыгың сездирбей,
Жарык маанай, жаркылдап сен күлүп кел.
Бүгүн мага ак көйнөгүң кийип кел,
Мага жаккан ак көйнөгүң кийип кел.

Жакшылар сендей болот,
Жактырган мендей болот.
Махабат таарынганда
Маалкатып келбей коёт.

Кебим бар элге айтпачу
Кечинде сен айтпачу
Кезикким келип турат
Кезикпе деп айтпачы
Жолуккум келип турат
Жолукпа деп айтпачы

Көз мончок сендей болот,
Көз арткан мендей болот.
Көз тийсе махабатка
Көрсө да келбей коёт.

Кайырма:

Жаш менен ойнойт тура,
Жалынсак болбойт тура.
Жашарткан менен жанды
Жайына койбойт тура.

Кайырма:

Айтууга келди кезек
Атанын уулу дешет
Жүгү чоң сөз экенин
Жүрөгүм ичтен сезет
Татыктуу бекенсиң деп
Заманым сөөмөй кезеп

Кайырма:
Атаке, атакебай
Жылт эткен санааңыздан
Самоого өзүбүз да
Сагынып калабыз да
Эшик төр биз чоңойгон
Эркелеп барабыз да
Бактылуу узак жаша
Бар болуп арабызда

Табат деп ким сырымды
Таштаймын көз нурумду
Атымды элге угузуп
Арнаймын бар ырымды
Өстүрсөм экен сиздей
Мен дагы өз уулумду

Кайырма:
Атаке, атакебай
Жылт эткен санааңыздан
Самоого өзүбүз да
Сагынып калабыз да
Эшик төр биз чоңойгон
Эркелеп барабыз да
Оорубай узак жаша
Бар болуп арабызда

Ден-соолук берсе экен дейм,
Кылымды көрсө экен дейм.
Пайгамбар жаш да кутман
Тилегим берсе экен дейм
Каткырып карылыкты
Кайраты жеңсе экен дейм

Кайырма:
Атаке узак жашап,
Аман жүр арабызда

Жаздын күнү чиркин жапжаш балдай
Жазгы жамгыр себелейт эч басылбай
Жамгыр менен кошо чуркап бийлеген
Кызды көрдүм аппак көйнөк кийинген
Бийле бийкеч бийлей бергин тартынбай
Тоскоол кылбай карап турдум жалдырай

Мен ал кызга таанышууга умтулдум
Тике карап, таң калгандай бурулдум
Назик колун мага сунуп жылмая
Күлүмсүрөп атын айтты Гүлбайра
Ай Гүлбайра жакты мага атыңыз
Түк түшүнбөйм кереметпи затыңыз

Жибек сымал жамгыр болгон саамайың
Саамайыңдан назик гана сылайын
Мен өзүңө айткым келди шыбырап
Жалгыз сенсиң менин бактым таалайым
Ай Гүлбайра, күтөм сени Гүлбайра
Эстен кетпейт таанышканың жылмая

Кыраңдагы гүл сымал,
Кылактайсың, Айзат кыз.
Тоодон аккан мөпмөлтүр,
Булактайсың, Айзат кыз.
Каректериң карагат,
Балбылдайсың, Айзат кыз.
Кызыл калтар кундуздай,
Жалжылдайсың, Айзат кыз.

Кайырма:
Айзат кыз, Айзат кыз,
Жалжылдайсың, Айзат кыз.
Каректериң мөлтүрөп,
Балбылдайсың, Айзат кыз.

Ысык-Көлгө ак куулар, качан конот, Айзат кыз?
Экөөбүздө жолугуу качан болот, Айзат кыз?
Эми качан окууңду аяктайсың, Айзат кыз?
Качан сүйүү дептерин барактайсың, Айзат кыз?

Айдай сулуу, Айзат кыз,
Күндөй сулуу, Айзат кыз.
Асылымсың, Айзат кыз,
Ашыгымсың, Айзат кыз.

Ат арытып алыстан сага келем, Айзат кыз,
Ак сүйүүнүн гүлдөрүн терип берем, Айзат кыз.
Махабаттын дастанын угасыңбы, Айзат кыз?
Ак кебездей колуңду сунасыңбы, Айзат кыз?
Айзат кыз, Айзат кыз.

Кайырма:

Шибер бойлоп жалгыз келем ыр ырдай
Ширин ойлор бүт денемди бек чырмай
Көк шиберде сууну көрүп кош тамчы
Шүүдүрүм деп күлүп койдуң шыбырай
Шүүдүрүмдөр айткылачы не жашынып жүрдүңөр?

Акак таштай мөлтүр тунук кош тамчы
Ак сүйүүнүн боло көргүн дабасы
Сырымды мен силерге айтып турайын
Шыбыраган сөзүңөрдү угайын
Шүүдүрүмдөр шыбыраган сөзүңөрдү угайын

Учасыңар бууга айланып асманга
Кайра эртелеп таң эртеге келгиле
Өзүңөрдөй мөлтүрөгөн туптунук
Акак сүйүү ала келип бергиле
Шүүдүрүмдөр аппак сүйүү ала келип бергиле

Оромол чачтуу периштем,
Убайың тартам кечиксең.
Ашыктык гүлүн берейин мен,
Ак-Буура бойлоп кезиксең.

Талыкпай тиктейм нур жүзүң,
Татынам, таңкы жылдызым.
Оорутуп жүрөк жактырды,
Ордолуу Оштун бир кызын.

Жоругу жазгы жайдасың,
Жоогазын болуп жайнасың.
Коргошун болуп кетемби мен,
Кургурум, памил чайдайсың.

Сурмалуу сулуу периштем,
Сумсаям бир аз кечиксең.
Сунмакмын сага гүлүмдү мен,
Сулайман тоодон кезиксең,
Махабат гүлүн термекмин,
Ак-Буура бойлоп кезиксең.

Кой көздөрүң жалжылдап,
Карагаттай күкүк ай.
Аясаңчы жүрөгүм,
Жаралантпай, күкүк ай.

Аруу түндө нур чачкан
Ай болоюн, күкүк ай.
Көңүл кушун көтөргөн,
Жай болоюн күкүк ай.

Кайырма:
Күкүк ай, күкүк ай,
Жүдөп бүттүм күтүп ай.

Бакан менен ийиндеп,
Суу аласың күкүк ай.
Жандап бассам жер тиктеп,
Уяласың күкүк ай.
Деги сенин купулуңа,
Толомунбу, күкүк ай?
Суу жетпеген какыр сайдай,
Соломунбу, күкүк ай?

Кайырма:

Уялбастан жаныма,
Жакын келчи күкүк ай.
Өзүң менен бир болоюн,
Макул дечи күкүк ай.
Терезеңдин түбүндө
Күтүп турам, күкүк ай.
Махабаттын ызгаарына,
Үшүп турам, күкүк ай.

Таарынба, садагам, таарынба,
Жалооруп сен мага кайгырба.
Жанаша сен басып ал менен,
Көңүлдү сен антип калтырба.

Башында сен жүрдүң каткырып,
Сүйөм деп сен мени жактырып.
Эгерде чын сүйсөң сен мени,
Эмне үчүн кетесиң калтырып?

Себебин билдим мен акыры,
Ата-энең бербептир тагдырды.
Болтуруп сени башка менен,
Кайгыга мени калтырды.

Сен тиктеп менин көзүмө,
Кечир деп ыйладың өкүнө.
Ошондо сенин сөзүңдү угуп,
Калтырап кеттим мен буулугуп.

Көлөмүң болуп кичине,
Көзүмдүн батсаң ичине.
Көргөзбөй алып жүрмөкмүн,
Көңүлү бузук кишиге.
Карааның болуп кичине,
Каректин батсаң ичине,
Каратпайт элем өзүңдү,
Карашы бузук кишиге.

Карасаң башка кишиге,
Кан толо түшөт ичиме.
Эриксе жүрөк булкунуп,
Ээ боло албайм күчүнө.
Жанаша калсам кичине,
Жалдырап карайм жүзүңө,
Балакет кылбасаң экен,
Башканын кирип түшүнө.

Бийлетип ой-санаамды,
Биликтей күйүп-жанамбы?
Элестеп жүрүп өзүңдү,
Эс жинди болуп каламбы?
Кыйсыпыр кылдың санаамды,
Кыргыздан сендей табамбы?
Сыртыңдан жүрүп кызганып,
Сыркоолуу болуп каламбы?

Көлөмүң болуп кичине,
Көзүмдүн батсаң ичине.
Көргөзбөй алып жүрмөкмүн.
Көңүлү бузук кишиге.
Айтканда күйүп айла жок,
Ашыктык оту кайда жок.
Мени сүй, эгер ишенсең,
Мен сүйгөн менен пайда жок.

Чачыбыздан өпкүлөгөн,
Ак жамгырлар, жамгырлар.
Май түнүндө бизди тапкан,
Махабаттын таңы бар.
Жамгыр жууп кусалыкты,
Көңүлдөрдү тазартып.
Көптөн күткөн жолугушуу,
Самап күткөн жолугушуу,
Сагынычтан арылар.

Кайырма:
Ак жамгырлар тыбыр, тыбыр,
Тыбыраган, тыбырап.
Арзуу айтып шыбыр, шыбыр.
Шыбыраган шыбырап
Жаратылыш жаздын жыты,
Жыттангандай жагымдуу,
Жан жыргатып жүрөктөрдөн,
Жүрөктөргө ыр улап.

Ажырашуу мүнөттөрү,
Коштошуунун мүнөттөрү
Булуттардай буюгат,
Мөлтүр тунук тамчы, тамчы
Мойнубузга куюлат.
Ал тамчылар токтоно албай,
Мөлт, мөлт этип токтоно албай
Кирпиктерден кулаган
Коштошууга кыйбай турган,
Көз жашымдай туюлат

Кайырма:

Ак жамгырга жарашкандай,
Ак кайындар, кайындар
Араладык жыргаткандай,
Алыс калып айылдар.
Экөөбүздөн башка жоктой
Бактылуулар ааламда,
Кош деп айткым келбейт такыр
Ага кандай шайың бар.

Кайырма:

Көк көйнөк кийсең, көңүлүм сага бөлүнөт,
Көркөмүң мага күн нуру болуп төгүлөт.
Көңүлүм чындап бурулуп калды, көлдүк кыз,
Көңүлдө сырым, көксөгөн муңум угуңуз.
Көңүлүм чындап бурулуп калды, көлдүк кыз,
Көксөгөн муңум, жүрөктө сырым угуңуз.

Ак көйнөк кийсең, акылым сага бөлүнөт,
Ажарың мага ай нуру болуп төгүлөт.
Ашыкмын дагы, ашыктым сизге, көлдүк кыз,
Атайын менин арнаган ырым угуңуз.
Ашыкмын дагы, ашыкмын чындап, көлдүк кыз,
Атайын сизге арнаган ырым угуңуз.

Кызылды кийсең, кыялым сага бөлүнөт,
Кылыгың мага кызгалдак болуп көрүнөт.
Кымбатым менин, көлдүк кыз, ырым угуңуз,
Кылымдар бою бүтпөсө экен ырыбыз.
Кымбатым менин, көлдүк кыз, ырым угуңуз,
Кылымдар бою бүтпөсүн ушул ырыбыз.