Жаркыраган бакыт-таалайым,
Жарык кылган маанайым.
Жаңы ачылган жоогазын белең, кызым,
Жытыңан ананайын.
Кагылайын менин каралдым,
Кан-жанымдан жаралдың.
Күйүп-жанып өзүңөр үчүн, кызым,
Бардыгына даярмын.

Кайырма:
Атыңдан кагылам, зирегим,
Аминам, Мадинам - белегим.
Акылдуу, ыймандуу болсо экен деп
Жараткандан тиледим.
Кагылам, сагынам, белегим,
Аминам, Мадинам - тилегим.
Асыл жол, бакыт жол бере көр деп,
Жараткандан тиледим.

Башыңарга бакыт консо дейм,
Ыйман, ырыс толсо дейм.
Эл үчүн деп согуп турган жүрөгү,
Элдин кызы болсо дейм.
Кубанычтан дайым күлсө дейм,
Туура жолдо жүрсө дейм.
Ата Журтун, өз мекенин аздектеп,
Эли-жерин сүйсө дейм.

Кайырма:

Жааган кардын түрлөрүнөн,
Бакчалардын гүлдөрүнөн.
Ашыктардын жүрөгүнөн,
Издей берем сени Мухаммед
Айдын, күндүн нур өңүнөн
Асылдардын тилегинен
Акыйкаттын мүрөгүнөн
Издей берем сени Мухаммед

Издейм сени жааган кардын түрлөрүнөн,
Издейм сени, ашыктардын жүрөгүнөн
Салам айтам сага Мухаммед

Көпөлөктүн учушунан,
Көңүлдөрдүн чокусунан,
Деңиздердин толкунунан,
Издеп келем сени Мухаммед
Акыл ойдун тазасынан,
Ааламдардын башатынан,
Аталардын батасынан,
Издей берем сени Мухаммед.

Издейм сени ааламдардын башатынан
Издейм сени аталардын батасынан.
Салам айтам сага Мухаммед

Сүйүүлөрдүн желегинен,
Момундардын белегинен,
Зикирлердин тереңинен,
Издеп келем сени Мухаммед.

Улуулуктун данегинен,
Урмат сыйдын дарегинен.
Үмөттөрдүн карегнинен
Издей берем сени Мухаммед

Издейм сени сүйүүлөрдүн желегинен
Издейм сени зикирлердин тереңинен
Издейм сени жааган кардын түрлөрүнөн,
Издейм сени, сени ашыктардын жүрөгүнөн
Издей берем сени Мухаммед.

Оорусам мен деп ооруган,
Апакем менин бар бекен?
Эмне үчүн келбейт бир жолу?
Атакем менин кайда экен?
Баладай качан күлөм мен?
Силер деп ооруп жүрөм мен.
Бар болсоң келчи, апакем?
Кайдасың айтчы, атакем?
Күттүрбөй келчи, ата-энем.

Чымчык да коргойт балапан,
Чымды алып келип талаадан.
Унчукпас болуп мен бүгүн,
Кусадан ооруп баратам.
Кызгалдак терип келсем дейм,
Апакем, сага берсем дейм.
Мойнунан бекем кучактап,
Аталык мээрим көрсөм дейм,
Энелик мээрим көрсөм дейм.

Сумсайып барат негедир,
Ачылбай сыздап көңүлүм.
Айта албай, ата, атыңды,
Өтөбү эми өмүрүм?
Күлкүнү билбей кайгырып,
Ой менен жашап өтөмбү?
Айта албай эми атыңды,
Өмүрдөн өксүп өчөмбү?
Жашоодон ыйлап өтөмбү?
Баладай качан күлөм мен?
Силер деп ооруп жүрөм мен.
Бар болсоң келчи, апакем?
Кайдасың айтчы, атакем?
Күттүрбөй келчи, ата-энем.

Талантым тоо томкоруп кетсе дагы,
Ташкындап ай-ааламга жетсе дагы.
Каалабайм досторум жок өткөн күндү,
Толтуруп бар байлыкты берсе дагы.

Атагым аалам жарып турса дагы,
Алгын деп алтын-күмүш сунса дагы.
Алмашпайм эч нерсеге досторумду,
Өмүргө мүрөк суусун куйса дагы.

Жакшыны, жаманды да тең бөлүштү,
Тагдыр буйругун сен тең көрүштүң.
Тилегим – ыраазы болсун Жаратканым,
Бактымды келет сага тең бөлүшкүм.
Кубанчымды келет сага тең бөлүшкүм,
Сүйүнчүмдү келет сага тең бөлүшкүм.

Сезимдер учат куш болуп,
Сагындым көпкө келбесең.
Бугумду басып турганда,
Ии, кусадан ыйлайт терезем.

Кайырма:
Сунам ыр десте сагынган кезде,
Жүзүң албырып күйгөндө эсте.
Оң көзүң тартып койгондо эсте,
Жамгырлуу кечте.

Кубалап кайгы-капамды,
Кулпулап берчи санаамды.
Ыраазы кылып сүйүп кой,
Ыр менен барган саламды.
Кайырма:

Байкабай айтсам атыңды,
Ойлорум сенде, билип кой.
Түшүңдөн түндө ойгонсоң,
Күткөнүм ошол, билип кой.

Жүрөктөрдүн тең сүйүшкөн күнүндө,
Таанышканбыз мажүрүм тал түбүндө.
Ашпай калды иш жүзүнө оюбуз,
Болбойт эми бизди күткөн тоюбуз.


Кайырма:
Тамчы болуп көздөн аккан жаш болуп,
Турсам керек азыр сенин көзүңдө.
Жүрөгүңдү отко салып кыйнаба,
Кечир мени, мени күтпө, ыйлаба.

Ишене албай менин жазган катыма,
Терезеңден улам карап күтөрсүң.
Караанымды издеп, издеп карегиң,
Талыганда бир күнү үмүт үзөрсүң.

Кайырма:

Нечен жылдар, айлар өтсө, күт өтсө,
Өткөн тагдыр жашап калар жүрөктө.
Ыраазымын сени күткөн күндөргө,
Ыраазымын ошол ар бир мүнөткө.

Кайырма:

Кыргыз элим байыртан,
Кылымдарды карыткан.
Ак калпактуу элимди,
Колдоп жүрөт Жараткан.

Жылдыз сымал асманда,
Жанып турат жан элим.
Өркүндөй бер, өсө бер,
Келечеги зор элим.

Кайырма:
Кылымдардан кылымга,
Кыргыз уулу сакталган.
Элим аман болсун деп,
Тилегеним Кудайдан.
Керек болсо жанымды,
Алгын мейли, Теңирим.
Бирок сакта тынчтыгын,
Бейпил кыргыз элимдин.
Суранарым тынчтыгын,
Сакта кыргыз элимдин.

Мейман келсе дасторкон,
Жайып турат бай элим.
Ак кымызын, ак нанын,
Сунуп турат жан элим.

Душман келсе майтарган,
Жигиттер бар кайтарган.
Бүркүт сымал асманда,
Мекен, элин сактаган.

Ата-бабам Бакайдан,
Кыргыз уулу сакталган.

Кайырма:

Көз тийбесин элиме,
Көз тийбесин жериме.
Таазим кылып суранам,
Колдоп жүргүн, Жараткан.

Биздин мекен эзелтен,
Мейман, достун мекени.
Көз артышкан душмандын,
Агып түшсүн кареги.

Кайырма:

Апаппак кардай сүйүүсү бардай,
Ачылып көңүлдөр.
Кубаныч толуп, ушундай болуп,
Өтсө экен өмүрлөр.

Чогулуп достор, айтылып тосттор,
Тосолу майрамды.
Ыйлаткан күндөр, ой баскан түндөр,
Шаттыкка айланды.

Айланды бүгүн, сүйүүгө айланды.

Кайырма:
Таалайым сенсиң, жарык маанайым сенсиң,
Ырым да сенсиң, бүтпөс сырым да сенсиң.
Чүрөгүм сенсиң, менин жүрөгүм сенсиң,
Тагдырым сенсиң, бардыгым сенсиң.

Байлыгым сенсиң, бардыгым сенсиң.

Жылдызың жанып, жылуулук алып,
Караймын көзүңө.
Ардагың мен деп, күткөнүм сен деп,
Ишенип сөзүңө.

Сулуусуң дайым, жаңырган айым,
Жашынып барайын.
Бактыма консоң, түгөйүм болсоң,
Сыйлап бир алайын.

Кайырма:

Шуулдаган теректердин дабышы,
Сооротушу, көңүлүмдү алышы.
Соолуп барат азап чеккен жүрөгүм,
Адат болду көз жашымдын агышы.

Кайырма:
Армандарым ичте жүрөт көрүнбөй,
Айсыз түндүн чеги болбос төрүндөй.
Үзүлө албай жашайт үмүт,
Саргаямын күтүп жүрүп,
Күзгү жалбырактын өңүндөй.

Бизде болчу махабаттын ысыгы,
Таптым дегем ак сүйүүмдү чыныгы.
Ак тилектер талкаланып чачылып,
Колго тийди анын майда сыныгы.

Эстей берем чогуу жүргөн күндөрүм,
Сен бар үчүн жашоом кооз, чүрөгүм.
Эркелетип нуруң сени, сен мени,
Уччу элек го мейкининде дүйнөнүн.

Кайырма:

Айсыз түндө жылдыздарды санаймын,
Жарыгы өчкөн кош жылдызга караймын.
Соолубасын жазда ачылган гүлүңөр,
Адамзатка мен ошону каалаймын.

Кайырма:

Бул ыр Гүлгүнай менен биргеликте аткарылган

Жаз мезгили жылуу-жумшак кийинип,
Жылдыздуу түнү сен экөөбүз биригип.
Өмүр балын жаңы татып турганда,
Өрүк гүлү бизге турду ийилип.

Кайырма:
Сенин мээримиң гүлдөн артык сезилди,
Жел сылады аппак, нурдуу бетиңди.
Дүйнөдөгү жалгыз кызык сен болсоң,
Дүүлүктүрүп кереметтүү сезимди.

Жыбыраган жылдыз улам суюлуп,
Ай шооласы жерге берип сулуулук.
Билинбестен өтүп жатты өзү эле,
Сенден мага, менден сага жылуулук.

Ал аңгыча ай да чыгып жаркырап,
Аалам турду агыш тартып жалтырап.
Махабаттын же жаштыктын күчүбү?
Туруптурбуз эс-мас болуп магдырып.

Кайырма:

Келечеке көз жаштарын төккөн ким?
Кереметтүү из калтырып өткөн ким?
Улуулуктун мээримине бөлөнүп,
Урмат, сыйы улам бийик өскөн ким?

Кайырма:
Ал Мухаммед пайгамбарым акыркы,
Керек болгон үмөттөргө азыркы.
Ал Мухаммед ааламдардын асылы,
Жашайлычы үмөттөр татыктуу.

Аалам ыйлайт, бил ал азан айтканда,
Ал шапаат, шириз дүйнөдөн кайтканда.
Анын жолун турат дайым көрсөтүп,
Жылдыз болуп сахабалар асманда.

Кайырма:

Атакем, ай, акыл айтып чоңойттуң,
Ыйлап ийсем шашып кетип соороттуң.
Эми сизге ак тилегим билгизем, атакем,
Бакытын көр эң бактылуу жомоктун,
Таалайын көр эң таалайлуу жомоктун.

Кудай колдоп аткарылсын оюңуз,
Каалаарыбыз дагы көпкө толуңуз.
Куттуу үйдүн кубанычын арттырып, атакем,
Эл ичинде эсен-аман болуңуз,
Калк ичинде кадыр-барктуу болуңуз.

Кыргызымдын кымбат наркын сактайлы,
Бийик тутуп ата-энени барктайлы.
Коломтонун оту болгон атакем,
Эртеби кеч эмгегиңиз актайлы,
Дайым сыйлап жакшы сөздү арнайлы.
Ата-энени урматтайлы, барктайлы.

Санаанын жүгүн артынып,
Сагынып келдим шашылып.
Бут тоскон адамдарга,
Ишенбей жалгандарга,
Жолуктук элден жашынып.

Сүйдүм го бала кезимден,
Ал күндөр кетпейт эсимден.
Көзүмдөн аккан жашым,
Ысытып карындашым,
Акты го менин бетимден.

Махабат кандай улуулук,
Маңдайга жазган сулуулук.
Бар беле жашырганың?
Ыйладың неге, жаным?
Өксүдүң айтпай буулугуп,
Ыйладың неге буулугуп?

Жүрөктү жалган кыйнады,
Сезимим сени кыйбады.
Көзүңдү карап турдум,
Өзүңдү аяп турдум.
Түн дагы сен деп ыйлады,
Коюу түн кошо ыйлады.

Жаныңда дайым болоюн,
Бакытка салып ороюн.
Көтөрүп көңүлүңдү,
Көп тилеп өмүрүңдү,
Сүйүүңө сенин толоюн.

Көп умтулдум, унута албадым,
Жүрөгүмдөн орун алыпсың.
Капилеттен сага жолуктум,
Татынакай келин болупсуң.

Сен экөөбүз калдык бир болбой,
Кошулбайбыз эки тоолордой.
Эмне кылабыз, арман жоктур, ай?
Жүрөктөрдө арман толтура.

Көгүчкөнүм, кош болгун эми,
Суранам сенден, эстей жүр мени.
Капилеттен сага жолуктум,
Татынакай келин болупсуң.

Кош болгун эми,
Унутпайм сени.

Балапан кез, бала чак,
Мөлтүр, таза булактай.
Төрт айланып ааламды,
Жүрөм сени таба албай.

Кайырма:
Бала, бала, бала чак,
Кандай сонун ушул чак!
Мөлтүр, таза булактай,
Балапан кез, бала чак.
Бала, бала, бала чак,
Бала, бала, бала, бала чак,
Шүүдүрүмдөй таптаза,
Бала, бала, бала, бала чак.

Чагылгандай чарт этип,
Өттү, кетти бала чак.
Кош айта албай калыпмын,
Кетип калды таарынчаак.
Жомок сымал бир келип,
Кетип калдың, балалык.
Издеп, издеп таппадым,
Кеткен окшойт таарынып.

Кайырма:

Жаратканым аллахтын,
Аты менен баштадым.
Жаман жорук жасабай,
Баарын артка таштадым.
Аруулукка чакырган,
Алаах жолун кармайын.
Бизге берген нээманттын,
Баркын билбей калбайлык.

Биз мусулман баласы,
Элдин камын ойлонуп.
Тынчыбаган санаасы,
Уктатпаган түн бою.
Көкүрөктө жарасы,
Муктаждарга бололу.
Гүлзарладын талаасы,
Ынтымакта, урмат болсун.
Улуу-кичүү арасы,
Ал анткени, биз мусулман баласы.

Адал менен арамды,
Айрымалап билели.
Ар нерсеге сыйынбай,
Бир Алахты сүйөлү.
Таалай күтүп адамдар,
Таза болсун жүрөгү.
Ата-энени ардактап,
Бийик тутуп жүрөлү.

Оо жараткан! Өзүң бизди туура жолго салгандан кийин,
Ошол туура жолдон, дилдерибизди азгыра көрбө.
Бизге өз даркөйүңдөн ырайым жана мээримдүүлүк тартуула.
Албетте, сен гана берешенсиң.

Бизге берген кураның,
Бийик туткан урааным.
Ар балээден сактаган,
Күчүн көрчү дубанын.
Сен жиберген элчинин,
Шапаатында бололу.
Жаратканым өзүңдөн,
Мээримиңе тололу.

Канча мезгил өтсөда,
Көз алдымда элесиң.
Топурагың алтыным,
Тоодой дем, күч бересиң.

Айылым менин,

Балалыктын дептери,
Өмүрүмдүн мектеби.
Эч унутпайм сени,
Сагындырган мени.
Айылымдын кечтери,

Каагылып келем,
Сагынып келем.
Сакта деп жерим,
Жаратканга, жалынып келем.

Асман тиреп мелжиген,
Ак кар баскан тоолорум.
Көргүм келип сагындым,
Улар учкан зоолорун.

Мөлтүрөгөн наристе,
Бала болуп калсамчы.
Дептеримди колго алып,
Мектебиме барсамчы.
Арманым менин,

Терек сайдын кечтери.

Ойдо жок жерден оргуштап чыкты,
Ойлобой элим муң-зарды укту,
Он алтынчы жылдагы үркүн,
Оодарып элди кайгыга жыкты.

Арга жок элим Кытайга качты,
Асыраш үчүн алтындай башты,
Жамгырдай жааган көзүнүн жашын,
Аргасыз элим кум чөлгө чачты.

Кеткени кетти кытайга жетти,
Кета албай калган кээ бирөө кантти,
Кейиштүү күндөн түңүлүп акыр,
Коштошуп бирөө о дүйнө кетти.

Жолдо нечен жан сууга агып өлдү,
Жоголгондорго ким көңүл болду,
Жегенге нан жок, же талканы жок,
Жокчулуктан канча жан өлдү.

Санааны кечип канча таң атты,
Сапарда жүрүп канча күн батты.
Кыргызым мынча кыйналып кеттиң,
Суу таппай кээде таңдайың катты.

Азапты кечип нечен таң атты
Арманга толо нечен күн батты
Баласын алып калктан ажырап,
Кан сырап эне талаада жатты.

Кайрылып кетем бул жерде неге?
Кайраты кеткен байкуш энеге,
Катарлап басып баласын алып,
Калк менен кошо жөнөгөн эле,

Каргаргаша болуп калктан адашып,
Калкты ой басты, калкты жер басты,
Калкынын алыс кеткенин көрүп
Кансырап эне талаада жатты.

Жанында бала чыркырап ыйлайт,
Сулк жаткан эне эч нерсе туйбайт,
Жөрмөлөп келип он айлык бала,
Эмсем деп эне боорун тырмалайт.

Ошентип эне о дүйнө кетти,
Он айлык бала не күнгө жетти
Оонактап ыйлап боорун тырмалап,
Энесин ээрчип артынан кетти.

Сексенге чыккан абышка өлдү
Секелек кыздар муң-зарды көрдү
Сегизге жашы толо элек бала
Сегизге толбой кордукту көрдү.

Бешикте жаткан наристе өлдү,
Бешиктен чыкпай кордукту көрдү.
Ыңаалап ыйлап, жүрөктү эзип,
Бешикте бала ажалды көрдү.

Кытайга жетпей канча жан өлдү
Кыямат азап канча жан көрдү
Кыргызым бүгүн ойлонолучу
Кыйла жыл мурда өткөргөн күндү.

Душмандан канча запкыны тарттык,
Дайынсыз кетип камалып жаттык
Ойгонуп эми тендикке келип
Оодарып баарын чынтыкты таптык

Куржунумду көтөрүп,
Сага келем, сулуу кыз.
Кубулжутуп үн салып,
Ырдап берем, сулуу кыз.

Кайырма:
Чапчыманын белинен,
Аксы, Чаткал жеринен.
Салам алып келе жатам мен,
Ала-Бука элинен.
Алып сени качайын деп,
Кара-Кулжа жеринен.

Жетелешип жайлоого,
Кетеличи, сулуу кыз.
Арча жыттуу мекениме,
Жетеличи, сулуу кыз.

Кайырма:

Чалкып жаткан Чаткалга,
Кетеличи, сулуу кыз.
Терек-Сайдын сууларын биз,
Кечеличи, сулуу кыз.

Кайырма:

Бакыт кушун кармаган,
Болчу менин жубайым.
Ширин, таттуу балдардан,
Берсин бизге Кудайым.

Кайырма: